Ilaten Nakmikiyaghqaa-ghhnaluten
Vote.gov-em kayusighaqaten:
Qamaglluki states-eni iwerngaqun North Dakota ilasaghqagut nakmikivagilgafsi nakmikilleghmi. Nakmighhu state-en nalighmeng territory-n ifkaqayugmi minyumi naalkennaluki liilightuusat elpenun ayuqelghiit.
Amarakaghmiit kiyaghlleghhiit U.S.-ngunghilngughmi, ilalluteng U.S.-em armingi nengllugutkullghiit, ilaasaghngaaghmeng nakmikimun enkaam aapsaghngaaghmeng aviilluteng nakmikusimeng imighluku Federal Post Card-em Igaa (FPCA). Amarakam armingita nengllugutangi, ilangistun maligusaghqagut U.S.-em nakmikistengita maligsaghqiit ilannaluteng ama aapnaluteng nakmikusimeng. Wata liitaghaghyukuvek takugu Iingunita Nakmikistengan Kayutangan Qepghaghviga (Laluramkestun).
Iingunaanun tuunvigituq nakmikimun ilatelleghmun. Nakmikistet allulluteng state-enillu territory-nilu maligsaghqaqiit ellmeng katam nakmikistem ilatellghanun liilightuusaatneng. Nakmighhu state-en nalighmeng territory-n ifkaqayugmi minyumi naalkennaluku nakmikistem ilatellghan tuunviga.
Qamaglluki state-et iwerngaqun North Dakota ilatesaghqaqiit yugyaget nakmikiyukata. Ilangi states-em ilasaghqaqniit 30 aghneq nakmikillghem sivungani, ilangi enkaam ilatestaqiit tawavek Nakmikilleghem aghneghanun. Megnunaghtuq liisimakelleghqan liilightuusii state-egpek.
Nakmighhu state-en nalighmeng territory-n ifkaqayugmi minyumi esghaghnaluku ilatellghen state-egpek tuunvigan sivungani. 30 aghneghuyaghngaaghmi sivutghaghlluku nakmikillghem.
Amalleqa esghaqaghluku ilatellghen igaqumakuni “inactive” (igleghangunghilnguq). Tawaten lliighyaghngaaghpek ayuquten nakmiillghisimakuvek maalgugegneng kavemem nakmikillghanunllu ama nakmikillghem qepghaghtengitallu tuqlughnaqutkesimakangaten.
Igleghangunghilngulleq quunpeng ilanneqiggneghisaghngata. Wataqaaghaq sayaghqalguughnguq nakmikinqigsaghqaghhnaluten. State-egpek nakmikillghem website-angan nalighmeng negpek pingan kayusiinnaghaten uutghutelleghqaa igleghalghimun nalighmeng kiimsighnaghaat aaptelleghten.
Nallghughqengngwaaghluku ilasimaten aatghen elqughulluku address-enllu ama party-gpek ilatngallgha. Takugu state-egpek ilatfigan qukfignegha ungipaghqameng naten nutaghtelleghqan nakmikilleghpek ilatellghan ungipaa.
Qantaghanun nuugtekaghngaaghpek walluumlluu uyavanun, nutaghsaghqaqan nakmikistem ilatellghen address-an allangughsiimakan. Nakmikigu state-en nallighmeng territory-n ifkaqayugmeng minyumeng esghaghnaluku naten ilatelleghqan online-ekun nalighmeng tuyughluku. State-an online-akun namikistemeng ilatestikayukan, tawatelleqenghitawha allangughhragkiillgha. Tuunakaten allangughtelleghten state-egpek ilatellghan tuunviga sivutghulluku, 30 aghneghuyaghngaaghmi Nakmikim aghneghan sivungani. State-egpek driver license-eghraghaghmeng nalighmeng ID card-eghraghalguyaghqaayaghaaten. Esghaghhu natelngughmeng ID-meng state-eghpek pilgusaghqaten. (Laluramkestun)
State-egpen nuugtelleq
State-enginaagpeni nuugteghngaaghpek, paniinang ilatellghen nutaghsaghqaqan address-eghraghaghpegun.
Ilanganun state-em nuugtelleq
Ilaten state-eghraghaghpek tuunviga sivutghulluku, 30 aghneghuyaghngaaghmi nakmikim sivungan. Pilleghqiighusimakuvek ilatelleghmeng state-eghraghaghpeni Nakmikivigem Aghneghan sivungani, state-ekuvinghaghpek nakmikisaqsengaten tuyughluku nalighmeng gginasaghlluku. Umiilegpagem nakmikillghan uksaani, state-ekuvinghaghpek nakmikisaghqaqaten tuyughluku nalighmeng gginasaghlluku. Taam kaingunaneng, ilasaghqaguten state-eghraghaghpeni.
Akmavek nuugtelleq.
Amarakaghmiit kiyaghlleghiit Amarakangunghilngughmi, ilasaghngaaghpek nakmikimun enkaam aapsaghngaaghpek avilluten nakimikusimeng imighluku Kavemem Igakun Tuyuqayugkun Imighyaghqameng (FPCA) (Laluramkestun). Esghaghhu Kavemem Nakmikillghan Kayutangan Program-anga (FVAP) (Laluramkestun) wata atightughyaghqaneng yarminengllu akmanlluteng nakmikilleghmeng.
Tamaghhiita state-et allakaghmeng ayuqut ilatelleghqiit nakmilleghqaghpenengllu allangughtelleghpeneng party-gpeneng. State-egpegun ayuquq, aapseqngwaten party-gpek ilatnguluten nakmikimun. State-en party-ngitaqsaghngaaghmi ayuquq nakmikistemun. Tuqlughhu state-egpek nalighmeng negpek nakmikistem qepaghviga naten pilleghqan enkaam tuunvilgutanga kiyaghfigpeni. Party-meng nakmikilleghqameng piivnganghituq tamaghhiitni state-eni.
Naten alngunak sangwaa party-ksaghngaaghpegu, nakmikilleghqaq tawatetulkasaghqaguq nakmikilleghpigaghmi nakmikisaghqat kanaghhnaqelghiit qepghaghvignun. Party-gpek natetulnga pitnguuq nakmikinaqneghpek wetku nakmikiyuwhaalleghmillu caucus-enillu (Laluramkestun).
Ilatkuvek nakmikimun, tuyughlleqaten nakmikimun ilatellghem iganeng. Una igaq kellmighqaqaa ilatnganiluten enkaam nakmikiyaghqaaghtengnganiluten. Nakmikillghem ilatellghan igaa kiyang igaqngaaq aatghen, negpek address-anga, enkaam address-anga nakmikivigem pivigkan. Amalleqa esghaghyaghngaaghpegu nakmikistem ilatellgha state-eghpek nakmikivigem ilatfigan esghasiikun online-ekun.
Aatghen nalighmeng address-an allangughsimakuni, nutaghtaghsaghqaqan nakmikistem ilatellgha. Nutaghtaghtekuvgu nakmikistem ungipaa, nutaghaghmeng nakmikistem ilatellghan igangyaghngaaghpek ayuquten, state-egpegun ayuquq. Aapsaghqalgukuvek, negpek kestistengan qepghaghviga itagnalleghpigaguq kayutnguluku.
Kiyang kelqesanghisaghngaaghpegu nakmikistem ilatellghan igaa nakmikinaluten, iwernga ilanganeng kelgutiyaghqaayaghngaaghpek ayuquten (Laluramkestun). Liitaghaghhu nakmikistem ilatellghaneng (Laluramkestun).