1. Antaŭ 55 jaroj forpasis Ferenc Szilágyi (Síladi, 1895-1924-1967), hungara kaj svedia ĵurnalisto kaj esperantisto; aŭtoro de kvar novelaroj (Trans la fabeloceano 1932, La granda aventuro 1945, Inter sudo kaj nordo 1950, Koko krias jam! 1955) kaj de la romano Tiel okazis, aŭ Mistero minora (1958), kompilinto de la antologio 33 rakontoj (kun Reto Rossetti, 1964); fondinto de la revuo Norda Prismo (1955), kiun li redaktis ĝis sia morto; ĉefkunlaboranto de Enciklopedio de Esperanto, membro de la Lingva Komitato (LK, 1930-48) kaj Akademio de Esperanto (AdE, 1948-67), prezidanto de TEĴA (1956-57), sekretario de la Belartaj Konkursoj de UEA (1953-57).
• Legu pli en la enciklopedio Nia Diligenta Kolegaro (p. 275-276).
Baldaŭ okazos en la tuta mondo diversaj eventoj, renkontiĝoj kaj festoj lige kun la Zamenhof-tago, la 15a de decembro. Por montri la viglecon de tiuj okazoj, la retejo Eventa Servo disponigis specialan paĝon: 
«“Temas pri diro de preskaŭ la samo”, laŭ vortoj de la itala verkisto Umberto Eco. Estas tuta mondo en ĉi tiu “preskaŭ”. Traduki estas alfronti la alion, la malsamon, la nekonataĵon. Ĉi tio ofte estas la esenca antaŭkondiĉo por ĉiu, kiu volas aliri universalan, multoblan, diversan kulturon. <…> En epoko karakterizita de la serĉado de identeco, tradukado restas neanstataŭigebla kuracilo kontraŭ memizoliĝo. Ĉar sen ĝi, kiel skribis la franc-usona aŭtoro George Steiner, “ni vivus en provincoj ĉirkaŭataj de silento”», – skribis Agnès Bardon, la ĉefredaktoro de Unesko-Kuriero en la ĉefartikolo de la dua ĉi-jara eldono de la Kuriero.
Por celebri la Zamenhofan feston, kiu estas ankaŭ tradicie la Tago de la Esperanta Libro, la Internacia Ligo de Esperantistaj Instruistoj (ILEI) proponas simbolan tutmondan legadon, donante la elekton inter du malsamaj, sed same gravaj kaj signifoplenaj verkoj.
Okaze de la centjariĝo de la naskiĝo (16 novembro 1922) de la portugala verkisto José de Sousa Saramago la libroservo de UEA dum la tuta novembro ofertas lian novelon Rakonto pri Nekonata Insulo (traduko de P.S. Viana) kun sesona rabato, sendepende de la mendata kvanto.
Krom siaj retejo, letero… kaj partopreno en kelkaj kongresoj, la Akademio de Esperanto komunikas kun la publiko per Konferenco de la Akademio, prelegserio okaze de la Zamenhof-festo. La unua okazis pasintjare, la dua okazos la 14an kaj 15an de decembro, de la 14a ĝis la 15a40 UTC: dek akademianoj prezentos (per Zoom) prelegojn pri temoj interesantaj la Akademion kaj la ĝeneralan publikon.
Universala Esperanto-Asocio salutas Unuiĝintajn Naciojn kaj ĉiujn homojn de bona volo okaze de la Internacia Tago por Toleremo, la 16a de novembro 2022.
