IBM
International Business Machines Corporation | |
---|---|
![]() | |
Unternähmensform | Corporation |
ISIN | US4592001014 |
Gründig | 16. Juni 1911 |
Sitz | Armonk, New York, USA |
Leitig | |
Mitarbeiter | 350.600[1] |
Umsatz | 79.59 Mrd. USD[1] |
Branche | Informationstechnik |
Uffdritt im Netz | www.ibm.com |
D International Business Machines Corporation (abchürzt IBM; wörtlechi Übersetzig: Internazionali Büroarbet-Maschine) isch es amerikanischs Undernääme, wo dr Herman Hollerith ane 1911 no mit em Firmenaame Tabulating Machine Company gründet het. Em Hollerith syni Maschine het me bruucht zum Informazioone automatisch z vrschaffe. Me seit em Hollerith trum au dr Vatter vo dr Datevrarbeitig.
Gschicht[ändere | Quälltäxt bearbeite]
D IBM isch z Armonk im US-Bundesstaat New York dihei. Si ghöört zu dr grööschte Firmene wältwyt i dr Branche vo dr elektroonische Datevrarbeitig und vo dr Hardware und dr Software für Computer.
Ane 1924 het sech d Firma, wo jetz scho dur Fusioone mit anderne Fabrigge für Rächnigsmaschine grösser woorden isch, dr nöi Naame „International Business Machines Corporation“ ggä. Si het bsunders Rächnigsgräät und äänlechi Produkt für d Wirtschaft und d Verwaltige gliferet. D Spezialiäät vo dr IBM isch s Gschäft mit de Lochchaarte gsy, wo me im 20. Joorhundert wältwyt in unglaublich grosser Mängi bruucht het.
I dr zwöite Helfti vom 20. Joorhundert het d IBM, wo alewyl bi de füerende Aktöör uf em Gebiet vo dr Mikroelektronik-Technik drby gsi isch, die eerschte modäärne Computer entwicklet, und gly druufabe au d Grossrächner; und drzue sind jetz au d Trucker für EDV-Dateie choo. Aber drnäbe het men au elektrische Schryybmaschine aabotte, wil die früene Computer für Privaati und au für chlyni Büro vil z umständlech und z tüür gsi sind.
1982 het me dr eerscht IBM-PC chönne chaufe. Ane 2004 het s Undernääme d PC-Abdeilig an chineesisch Computerkonzärn Lenovo vrchauft. Äs macht jetz näbe dr Härstellig vo technische Gräät, bsunders vo granz grosse Rächner, vor allem no uf dr ganze Wält im grosse Schtyl Berootige für EDV-Sache und uf anderne Gschäftsfälder.
Expäärte vom Zürcher IBM-Forschigslabor sind zwöimol mit em Nobälpryys für Füsik ggeert worde.
D Zäntrale vo dr IBM Düütschland, wo vo 2011 bis 2018 d Martina Koederitz gleitet het, isch z Eninge, Baade-Württebäärg.
Literatur[ändere | Quälltäxt bearbeite]
- Emerson W. Pough: Building IBM: Shaping an Industry and Its Technology. Cambridge (M)/ London 1995, ISBN 0-262-16147-8.
- Hermann K. Reiboldt, Raimund Vollmer: Der Markt sind wir – Die IBM und ihre Mitbewerber. Stuttgart 1978.
- Thomas J. Watson jr.: IBM – Ein Unternehmen und seine Grundsätze. München 1964.
Weblink[ändere | Quälltäxt bearbeite]
![](http://webcf.waybackmachine.org/web/20220814130458im_/https://upload.wikimedia.org/wikipedia/commons/thumb/4/4a/Commons-logo.svg/12px-Commons-logo.svg.png)