Happi
| |||||
Almoliih ääših | |||||
Nommâ | Happi | ||||
Tubdâldâh | O | ||||
Oornigloho | 8 | ||||
Luokka | epimeetaal | ||||
Laigos | p | ||||
Juávkku | 16 (happijuávkku) | ||||
Ráiđu | 2 | ||||
Saahâdvuotâ | 0,00143 · 103 kg/m3 | ||||
Ivne | ivnettem, kolgosin kuovgisčuovjâd | ||||
Kavnâmihe, kävnee | 1774, Joseph Priestley, Carl Wilhelm Scheele | ||||
Aatoomjiešvuođah | |||||
Aatoommassa (Ar) | 15,9994 | ||||
Aatoomsuonjâr, mittedum (rekinistum) | 60 (48) pm | ||||
Kovalentsuonjâr | 73 pm | ||||
Van der Waals suonjâr | 152 pm | ||||
Orbitaalrááhtus | 2s2 2p4 | ||||
Elektroneh elektronkoorâin | 2, 6 | ||||
Hapittemlovoh | -II, -I | ||||
Kristalrááhtus | kuđâhâš | ||||
Fysikaallâš jiešvuođah | |||||
Orroomhäämi | kaasu | ||||
Suddâmčuogâstâh | 54,36 K (-218,79 °C) | ||||
Tuoldimčuogâstâh | 90,20 K (-182,95 °C) | ||||
Kuulmâsčuogâstâh | 54,36 K já 0,152 kPa | ||||
Kriittisâš čuogâstâh | 154,6 K já 5 050 kPa | ||||
Moolisaijaavuotâ | (25 °C) 17,36 · 10−3 m3/mol | ||||
Suddâmliegâsvuotâ | (O2) 0,444 kJ/mol kJ/mol | ||||
Lievlâlumliegâsvuotâ | (O2) 6,82 kJ/mol kJ/mol | ||||
Lievlâteedâ | 1 000 Pa 61 K:st | ||||
Jienâ liähtu | 330 m/s 295 K:st | ||||
Eres jiešvuođah | |||||
Elektronegatiivlâšvuotâ | 3,44 (Pauling čiäkkádâh) | ||||
Jiešvuođâlâš liegâsvuotâkapasiteet | (O2) 0,918 kJ/kg·K | ||||
Liegâsvuođâsirdem | (300 K) 0,02658 W/(m·K) | ||||
CAS-nummeer | 7782-44-7 | ||||
Tiäđuh normaalliegâsvuođâst já -teddust |
Happi lii algâaamnâs, mon kemiallâš merkkâ lii O (oxygenium), oornigloho 8 já aatoomtiäddu 15,999 u. Rijjâ algâamnâsin happi lii visteliegâsvuođâst kaasun, já tot lii 21 % Eennâmpáálu áimukeerdist. Happi kávnoo luándust valjeeht ovtâstâhhân, ovdâmerkkân čääccin sehe eennâm- já källeevuáđu mineraalin. Happi lii eennâmkoorâst 47 %, já tot lii-uv eennâmkoorâ táválumos algâaamnâs.
Rijjâ happi reagist uáli älkkeht eres amnâsijgijn. Happi paijeentuálá puállám, já stuárráámus uási iälánijn tarbâšeh tom elimân. Happi luovvân šadoi ohtiimist, já maaŋgah iäláneh kevttih tom sellâvuoiŋâmist.
Jiešvuođah[mute | mute käldee]
Allotrooppisâš häämih[mute | mute käldee]
Happi ij kuássin lah luándust ovtâskâs atomin. Táválávt tot lii happimolekyylin (O2). Stuárráámus uási vyeliáimukeerdi haapist lii O2 já tot lii meid haapi häämi, mon elleeh pyehtih vuoiŋâđ. Haapist lii meid allotrooppisâš häämi, mii kočoduvvoo oconin (O3). Occoon lii iälánáid mirhâlâš vuoiŋâđ, já tot vahâgit já iärdud vuoiŋâmkiäinuid.[1] Pajeáimukeerdist tot ráhtá occoonkeerdi, mii iästá uásild piäiváá háitulii ultravioletsuonjârdem puáttim Enâmân. Tondiet meid occoon lii elimân veltihánnáá. Ive 2001 kavnui haapi nube häämi O4, mii šadda táválii happimolekyylist ko teedâ lii ucemustáá 20 GPa. Ton lasseen komovuođâst Eennâmpáálu alda kávnojeh ennuv happiatomeh (O). Komovuođâ happi lii čuolmâ satelliitáid tondiet ko tot reagist satelliit asemateriaalijgijn já muttá satelliit suonjârdem- já absorbistemjiešvuođâid.
Isotoopih[mute | mute käldee]
Haapist láá kulmâ stäđis isotoop: 16O, 17O já 18O, main 16O lii puoh táválumos (99,762 % haapist). Masa puoh 16O lii šoddâm helium fuusioreaktiost. 17O vuod šadda čiđđâsyklist, vety fuusiost. 18O šadda čiđđâsyklist pááccám 14N já helium fuusioreaktiost. Tondiet ko 16O já 18O šoddâm váátá helium já 17O tuše vety, te ucebeh tääsnih pyevtitteh enâmustáá 17O.[2]
Haapi radioisotoopeh láá kavnum ohtsis neljinubáloh. Kuhemus pelilumäigi lii 15O:st (122,24 s) já 14O:st (70,6 s). Paijeel seekunt pelilumäigi lii čuávuváin isotoopijn: 19O (26,91 s), 20O (13,51 s), 21O (3,42 s) já 22O (2,25 s). 16O keppisuboh isotoopeh pieđgâneh positroniemissioin typpin já 18O lussâduboh isotoopeh beetapieđgânmijn fluorrân.[3]
Ovtâstuvah[mute | mute käldee]
Haapi merhâšitteemus ovtâstâh lii čääci (H2O), mii lii haapi já vety ovtâstâh. Čääci lii haapi lasseen tergâdumos aamnâs Eennâmpáálust tiettum elimân. Nubbe oovtâkiärdánis haapi ja vety ovtâstâh lii vetyperoksid (H2O2). Vetyperoksid lii vuáimáás hapitteijee, já tot lii kevttum viälgudittemamnâsin já kuáddurakettij puáldimamnâs hapitteijen. Eres epimeetaaloksidijn tobdosumoseh láá čiđđâdioksid (CO2) já čiđđâmonoksid ađai hágá (CO). Čiđđâdioksid šadda orgaanlâš ovtâstuvâi pyelimist, já tot lii merhâšittee šaddovistekaasu. Čiđđâmonoksid vuod lii mirhâlâš kaasu, mii šadda čiđđâovtâstuvâi epitievâslii puállámist. Eres táváliih epimeetaaloksideh láá riššâdioksid já -trioksid sehe typpimonoksid já -dioksid. Taah oksideh láá ááimunuáskádâsah, já toh tovâtteh čácáduvâi já eennâmvuáđu suvrom. Happi ráhtá ennuv ovtâstuvâid meid metallijgijn. Meetaalovtâstuvâin haapist lii táválávt hapittemloho -II. Meetaaloksideh láá táválávt tergâdeh malmâmineraaleh. Meetaaloksideh láá kevttum meid ivneamnâsin já kemiallij reaktioi katalyytin. Maaŋgah alkaal- já eennâmalkaalmeetaalhydroksideh láá uáli vuáimáás alkaaleh.
Happi puáhtá leđe meid ionin teikkâ maaŋgâaatoomlâš ioni uássin. Ovdâmerkkân haapi ionist lii oksidioni (O2-), mii lii uássin meetaal oksidijn. Haapi já vety ionijn merhâšitteemuuh láá laagâ suvroduv tovâtteijee oksoniumioni (H3O+) já alkaallâšvuođâ tovâtteijee hydroksidioni (OH-). Eres algâamnâsij já haapi ionijn táválumoseh láá källeevuáđu mineraalijn orroo silikaationih, main oovtâkiärdánumoseh láá meta- já nesosilikaat (SiO32- já SiO44-). Kemikaalijn táváliih haapi molekyylionih láá karbonaat- (CO3-) já sulfaationi (SO42-) sehe isesuándijn kevttum nitraationi (NO3-) já fosfaationih (PO3- já PO43-).
Happi biologiast[mute | mute käldee]
Haapist lii uáli stuorrâ merhâšume Eennâmpáálu iälánáid. Šadoh já motomeh tiäbuh sehe bakteereh pyevtitteh haapi fotosyntees čuovâreaktiost. Čuovâreaktiost iäláán ohtimcuozzâdâh absorbist fotonijd ađai piäiváá čuovâ, mon energia pieđgee čäcimolekyyl happin já vetyn. Vety juátká ton maŋa fotosyntees čuávuváá muudon já happi luovvân ááimun. Uási haapist mana iäláán jieijâs sellâvuoiŋâmân. Masa puoh eennâmpáálu haapist puátá pyevtitteijei fotosynteesist. Masa puoh iäláneh tarbâšeh haapi sellâvuoiŋâmân, mast seelah luovâsmiteh ravâdâs energia kiävttusis. Sellâvuoiŋâmist luovvân čiđđâdioksid já čääsi, mon šadoh já tiäbuh vuod kevttih fotosynteesân.
Iäláán immuunsysteem sáttá kevttiđ haapi reaktiivisâš haamijd, nuuvt ko peroksidioni (O2-) já singlethaapi, mikrobij tuššâdem várás.
Käldeeh[mute | mute käldee]
- ↑ terveyskirjasto.fi Čujottum 19.4.2021 (suomâkielân)
- ↑ lpi.usra.edu Čujottum 19.4.2021 (eŋgâlâskielân)
- ↑ environmentalchemistry.com Čujottum 19.4.2021 (eŋgâlâskielân)