اوپیک
اوپیک (OPEC :Organization of the Petroleum Exporting Counties) پٹرول برآمد کرن آلے دیساں دی اک عالمی تنظیم اے ۔ اس چ الجیریا(الجزائر) ، انگولا ، انڈونیشیا ، عراق ، کویت ، ایران ، لبیا ، نائجیریا ، قطر ، سعودی عرب ،متحدہ عرب امارات تے ونیزویلا شامل نیں ۔ اوپیک دے بنیادی مقصداں چ تیل دی عالمی منڈی چ تیل دی قیمت نوں متوازن کرنا تے مناسب مقدار تک ودھانا شامل اے ۔ ستر دی دہائی چ تیل دی عالمی منڈی چ اوپیک نے بوہت طاقت حاصل کر لئی پر بسی دی دہائی چ ایہہ طاقت گھٹ گئی تے اوپیک اک کمزورادارہ بن گئیا ۔ اس دا ورکزی دفتر آسٹریا دے راجگھر ویآنا چ اے حالانکہ آسٹریا اس دا رکن نئیں ۔
اوپیک دی تریخ[سورس وچ لکھو]
قیام
ونیزویلا دکھنی امریکہ دا اک تیل پیدا کرن آلا دیس اے ۔ ترقی یافتہ ملک تیل نوں بوہت سستا خرید کے فیر استوں بنائیاں ہوئیاں شیواں تیجی دنیا دے دیساں نوں مہنگیاں ویچ دے سن ۔ تیل دی عالمی منڈی چ اصل طاقت امیر دیساں دے کول سی جنہاں دیاں حکومتاں تے تیل کمپنیاں مختلف حیلے بہانےآں نال تیل دی رسد ودھا کے اس دا مل (قیمت) بوہت گھٹ رکھدے سن ۔ اس گل نوں بنیاد بنا کے سب توں پہلے 1949ء چ ونیزیویلا دے صدر نے ایران ، عراق ، کویت تے سعودی عرب دیاں حکومتاں نال رابطہ کیتا ، جس دا مقصد اک مشترکہ ادارہ قائم کرنا سی ، جس چ تیل دے متعلق مسئلےآں تے تبادلہ خیال ہو سکے ۔اوس ویلے گل نا بنی کیونجے اینہاں ملکاں تے برطانیہ ، امریکہ تے فرانس دا اثر تے رسوخ بوہت ودھ سی بلکہ تیل دیاں کمپنیاں اینہاں دی ملکیت سن ۔ 1960ء چ اوہناں ملکاں دا اجلاس عراق دے راجگھر بغداد چ ہوئیا ، جتھے اوپیک دا قیام عمل چ لیائیا گئیا ۔