Bevüslavapük (,Medžuslovjansky’, büiko sevädik as el ,Slovianski’ «Slavapük») binon yufapük zonik pro Slavans, pejaföl ün 2006 fa grup pükavanas de läns difik. Pestabon su Vöna⸗Glügaslavapük e su nuiks natapüks Slavik: Rusänapük, Lukrayänapük, Polänapük, Tsyegänapük, Sloveniyänapük, Kroasänapük e.r. Desin binälon in suemovöf pro spikans pükas at. Pük labon gramati balugik, gens kil e fals mäl u vel as pluamanum pükas slavik, dat palärnovon fasilo e vifiko. Bevüslavapük binon stum yuföfik e frutik pro tävans e mens, kels vilons lärnön slaviki püki bal u mödikum.
Jenav Bevüslavapüka tefidon ko valaslavanetim. Gramati balid älautom dü yels 1659-1666 pädan kroasänik hiel ,Juraj Križanić’, petiädöli ,Gramatíčno izkâzanje ob rúskom jezíku’ (Bepenot gramatik dö Rusänapük). El ,Križanić’ pasevom äs valaslavanetiman balid, e pük, keli äbepenom, äbinon jenöfo migot pükas glugaslavik, kroasänik e polänik. Otimo lautans mödik äpüboms pükaproyekis okik, pato ün tumyel 19id e teldil balid tumyela 20id, ven valöpo in Yulop äsüikon netätim. Sams pasevöl binons pükaproyeks hiela ,Ján Herkeľ’ (1786–1853), hiela ,Matija Majar-Ziljski’ (1809–1892) e hiela ,Božidar Raič’ (1827–1886). Too, pos Volakrig Telid, kodü stad bolitik ettimik, valaslavanetim iperon veüti, e suemod püka bevüslavik päfibükon. (Yeged lölik)
|
|