У гэтым сезоне многае будзе па-новаму. Новая месца правядзення заняткаў — аўдіенц-зала пры кавярні Le Phare (вул. Леніна, 50), новы дзень — субота замест серады, новыя вядучыя. На першай сустрэчы імі выступілі журналіст Іна Хоміч (яна, дарэчы, мае філалагічную адукацыю) і экскурсавод Вольга Малафеечава. Але канцэпцыя курсаў застанецца той самай.
Гасцей чакаюць займальныя размовы, выкананне граматычных практыкаванняў, сустрэчы з цікавымі асобамі. Кожны занятак будзе мець пэўную тэму. Напрыклад, 6 верасня размаўлялі пра адпачынак і ўспаміналі, каму пашанцавала падарожнічаць гэтым летам і куды. Апроч таго, раз на месяц арганізатары плануюць запрашаць музыкантаў. Першым візіцёрам стаў беларускі паэт і музыка Алесь Камоцкі.
«Я не чакаю, што ўсе наведвальнікі курсаў пачнуць гаварыць па-беларуску, але можа хтосьці зменіць сваё стаўленне да беларускай мовы. У кагосьці, калі ён будзе чуць нешта па-беларуску, нейкія цеплыя пачуцці ўзнікнуць», — распавяла пра свае надзеі Іна Хоміч.
Часамі бывае, што выкладчыкі беларускай мовы размаўляюць на ёй толькі на занятках. Тут сітуацыя іншая — вядучыя карыстаюцца мовай у штодзённым жыцці. «Спачатку перайсці на беларускую мову было цяжка, нягледзячы на тое, што я яе добра ведала, — адзначыла Іна Хоміч. — Псіхалагічных страхаў многа. Але яны ўсе адпадаюць, калі пачынаеш гаварыць. Галоўнае — наважыцца. Мне стала камфортна ў беларускай мове. Я адчула сябе далучанай да нейкага глубіннага слою культуры. Гэта пачуцце параўнальна з тым, калі спяваюць фальклор. Ты чуеш гэтыя канструкцыі і адчуваешь, што словы як закадаваныя пасланні. Псіхалагічна яны пра нас. Прынамсі, у мяне гэта так».
Наступная сустрэча пройдзе 13 верасня а 17.00. Тема заняткаў — «500 год Аршанскай бітвы». Уваход вольны.
Комментарии
Комментарии: