Ràinig Sàl an darna làr agus cho luath ’s a dh’fhosgail e doras a’ flat bha fios aige gun robh rudeigin fada ceàrr. Sheas e an sin fad mionaid, ach cha chuala e fuaim. Mu dheireadh, chaidh e a-steach agus dhùin e an doras gu socair air a chùlaibh. Bha e a’ faireachdainn samh làidir searbh nach b’ aithne dha.
Thòisich e sìos an trannsa chumhang a chaidh tro mheadhan a’ flat agus aon uair ’s gun do dh’fhàs a shùilean cleachdte ris an dorchadas, mhothaich e gun robh solas a’ deàlradh fo dhoras a’ chidsin.
Stad e. Bha e cinnteach nach do dh’fhàg e solas air nuair a chaidh e a-mach na bu tràithe…
Sgrìobh mi sgeulachd ghoirid fhicsean-saidheans ann an 2010, Luathas-teichidh, agus nochd i ann an cruinneachadh de sgeulachdan, SAORSA, a chuir Ùr-sgeul an clò ann an 2011. Fhad ’s a bha mi a’ sgrìobhadh Luathas-teichidh, chinn am beachd nam inntinn gun dèanadh an sgeulachd deagh bhunait do nobhail. Ghlac na caractaran mo mhac-meanmna, agus aon uair ’s gun tàinig Luathas-teichidh a-mach an clò, thòisich mi air nobhail cheart a chruthachadh às. Chleachd mi an sgeulachd mar a’ chiad chaibideil agus lean mi orm a’ sgrìobhadh eachtradh nan caractaran on sin. Nis, tha an nobhail sin deiseil — Air Cuan Dubh Drilseach — agus tha mi toilichte a ràdh gun tèid a cur an clò tràth ann an 2013, fo sgèith an fhoillsicheir, CLÀR.
Anns a’ bhlog seo, tha mi an dùil sgrìobhadh mu chuid dhe na cuspairean a nochdas anns an leabhar, mu bhriathrachas ficsean-saidheans agus mun leabhar fhèin. Tha mi an dòchas gun cuir am blog seo ri susbaint na nobhail, agus a chùl air sin, gum bi e na thaic don fheadhainn a tha ùr gu leughadh ann an Gàidhlig. Ma tha ùidh agaibh anns na cuspairean seo, neo beachd agaibh air an sgeulachd, nach fàg sibh teachdaireachd. Bhiodh e sgoinneil ur smaointean a leughadh.
Tim Armstrong
‘S e fìr dheagh naidheachd a tha sa leabhar sa a thaobh leasachadh is leudachadh air farsaingeachd litreachais na Gàidhlig. Eil ceann-latha nas mionaidiche agaibh son foillseachadh fhathast?
A Choinnich chòir, Tha sin an dùil an leabhar a chur air bhog gu h-oifigeil aig an fhèis-litreachais, Aye Write, air an 18mh dhen Ghiblean ann an Glaschu. Tha sinn fhatast a’ cur a h-uile rud air dòigh ach cuiridh mi barrachd fiosrachaidh mun fhoillseachadh agus mun bhogadh air an làraich seo ann an ùine ghoirid.
Gabhaibh mo leisgeul, is dòcha nach eil seo an t-àite ceart airson sin, ach co-dhiù …
O chionn dà-fhichead bliadhna chaidh an nobhail shaidhfaidh dystopian _Y Dydd Olaf_ (An Latha Mu Dheireadh) a fhoillseachadh ´sa Chuimris, agus o chionn ghoirid chaidh an teacsa seo a chur ´sa eadar-lìon, an seo sios, far a bheil i ri faighinn an-asgaidh (ceanglaichean-lìn fo´n dealbh) :
https://ytwll.com/2016/05/y-dydd-olaf-owain-owain/
Tha mi ga h-eadar-theangachadh gus am Beurla (leth-dhèanta gus a seo, ged nach e ach ´draft´ a th´ann!) :
https://dl.dropboxusercontent.com/u/65030277/dyddolafEng.txt
Thoir ur beachdan dhomh, ma ´se ur toil e.
Am bidheadh fiù airson tionndadh Gàidhlig a rinn? (Cha b´urrainn dhomh sin a dhèanamh!)
Latha math, a Mhaighstir Armstrong! Chuir mi crioch air “an cuan dubh drilseach” feasgar seo. ‘Se nobhail sàr mhath à th’ann, ’nam beachd. An uair a bha Sàl ag ràdh gu bheil e ag iarraidh cùmail sgeapan sheilleanan-meala, rinn mi faite-gaire gun teagamh. Bidh mi ag òrdugh an dàrna leabhar gun dàil. (Seriously, thanks. I learned to read English with Robert Heinlein’s books, the juveniles and, shortly thereafter, the ones my parents would have banned if they only knew…. Having a good, science fiction yarn in not-too-intimidating Gaelic has been so terrifically helpful to me. My ability to form my own sentences still lags in a most frustrating manner, but now I am reading without having to reach for the dictionary more than once or twice a page.)
James chòir, Sgoinneil! Tha mi cho toiliche a chluinntinn gun do chòrd ACDD riut. Gu cearbach, chan eil an ath thè builleach deiseil fhathast, uil, faisg air deiseil a dh’inne na fìrinne. Tha corra chaibideil air tighinn a-mach anns an iris STEALL, ach tha mi fhathast ag obair oirre. Tha i a’ dol a bhith mòran nas fhaide, agus mar sin, tha e a’ toirt greis fhada a sgrìobhadh. Tha mi suas gu dreach de chaibideil 8, agus chan eil mi fiù ’s letheach slighe troimhpe. Ach tha mi an dòcha gum fiach e feitheamh!!! le meas, Tim