故仔

出自維基百科，自由嘅百科全書
跳去導覽 跳去搵嘢

Disambig.svg 揾緊花名係「古仔」嘅藝人嘅話，請睇「古天樂」。
一本故仔書；傳統上，文字係一種常用嚟表達故仔嘅媒介。
一個人喺度講故仔俾細路聽；喺世界多地嘅傳統當中，大人都會用講故仔傳承祖先嘅智慧。
故仔可以用好多種媒介表達，例如漫畫就係一種用連串定格圖像加少量文字表達故仔嘅媒體。

故仔（粵拼：gu3*2 zai2；英文：story / tale），本字係「古仔」[1]，係指用某啲媒介、向一個或者一班對象表達、一連串有先後之分、彼此之間有關嘅事件[2][3]，而一個以某啲形式－例如一段文字或者一段影片－將故仔表達出嚟嘅物體就係所謂嘅敘事體（narrative；嚟自拉丁文「narrare」－拉丁文當中「講解」嘅意思[4]）。故仔係真嘅又得、虛構嘅都得，真實故仔包括旅遊文學、回憶錄同自傳等嘅作品，而虛構故仔又有科幻、奇幻以及恐怖故仔等嘅類型[5]。

有多個人文領域都會研究故仔：敘事學同文學理論等嘅領域有興趣理解故仔，會對故仔做出各種分析；喺現代敘事學上，一般會將要分析嘅故仔揼散做唔同嘅敘事元素－敘事元素包括咗角色、背景設定同情節等等，呢啲領域嘅學者會分析故仔作者點樣運用呢啲敘事元素，並且將敘事元素分門別類（詳情可以睇橋段）[6][7]；而創意寫作領域嘅工作者就會運用呢啲知識，思考點樣作好睇嘅故仔同埋教人作好睇嘅故仔[8]。

故仔係普世文化通則（cultural universal）。噉講意思即係話，無論語言文化，世上已知嘅人類族群幾乎冚唪唥都有作故仔嘅行為。人類會為咗娛樂或者傳達知識等嘅目的而作故仔，透過作唔同形式嘅故仔展示想像力以及傳承先人嘅智慧，所以故仔不嬲都係文化嘅一個重要組成部份[9][10]；人類學同社會學等社科領域嘅學者喺嘗試了解一個人類族群嗰陣，好多時都會花心機研究嗰個族群嘅人之間流傳嘅故仔[11]。

概論[編輯]

睇埋：敘事學

定義[編輯]

喺敘事學（narratology；研究故仔嘅一個人文社科領域）上，故仔係指一連串彼此之間有關連嘅事件；有唔少學者仲會主張進一步嘅分野，話「故仔」指嘅係啲事件本身，而「敘事體」係表達串事件嘅媒介－一串用嚟講故仔嘅文字同個故仔本身係兩樣嘢[12]。

對於「故仔」嘅定義，有敘事學家噉樣講[12]：

「
原版英文："Narrative is a perceived sequence of non-randomly connected events, typically involving, as the experiencing agonist, humans or quasi-humans, or other sentient beings, from whose experience we human can learn."

粵文翻譯：敘事體係被（讀者觀眾）感知到嘅連串非隨機嘅相關事件，通常包括人類、類似人類嘅生物、或者第啲有感覺嘅存在作為經驗（啲事件）嘅主動體，而我哋人類能夠由呢啲經驗當中學習。

」

連串性（sequentiality）同事件之間嘅關連性（connectedness）一般俾敘事學界認為係故仔必要有嘅性質：想像一串文字，敘述咗一柞事件，柞事件彼此之間有關連、但完全唔知邊件先邊件後（缺乏連串性），讀者唔會能夠慢慢噉感受事態發展或者變化；而如果有一串文字，敘述一柞有明顯先後，但彼此之間完全冇因果關係、唔啦更嘅事件（缺乏關連性），讀者一樣會感受唔到事態發展或者變化－透過感知一柞事件嚟想像事態發展或者變化係故仔嘅核心特徵[13]。

事件性[編輯]

廿一世紀初嘅敘事學界有事件性（eventfulness，又可以譯做「重大性」）呢個概念。根據呢個諗法，一個吸引到人睇嘅故仔必需要有返咁上下重大，好似「我行去便利店，買咗個包，然後返屋企食個包落肚」呢啲濕碎嘅事件唔具有重大性，好難吸引到人去留意（難吸引讀者觀眾）。根據德國敘事學家胡夫·史密德（Wolf Schmid），一件有重大性嘅事件傾向具有以下五大特徵[14]：

  1. 有關（relevance）：一件重大嘅事件會對個故仔發生嘅世界或者地區造成明顯嘅影響－好睇嘅故仔往往會涉及故仔嘅舞台起巨大嘅變化，例：哈利波特打低佛地魔，令魔法世界唔使再驚黑魔王，改變咗成個魔法世界嘅秩序；
  2. 恆久（persistence）：一件重大嘅事件會令牽涉其中嘅角色有所成長，喺行為同情緒上有改變（角色發展）；事實係，有唔少學者認為，人睇故仔嘅其中一個目的係想要由其他人嘅經歷當中學習（睇埋下面「故仔教道理」）；
  3. 難測（unpredictability）：一件重大嘅事件係難以預料嘅，令讀者觀眾（喺睇到結局嗰陣）有驚訝嘅感覺－好睇嘅故仔好多時主角喺力量上遠遠弱過佢嘅敵人，等讀者觀眾難以估計佢會點樣打低敵人；而完全意料之內嘅事件係冇重大性、吸引唔到讀者觀眾嘅；
  4. 不可逆轉（irreversibility）：一件重大嘅事件係唔可以逆轉嘅－如果一件事件發生咗之後、個世界都可以輕易噉返去之前嘅狀態嘅話，就表示件事件根本唔重大；
  5. 不可重複（non-iterativity）：一件重大嘅事件係要難以重複嘅－難以重複表示件事件非常獨特、非常值得留意。

不過喺作故仔嘅過程當中，唔重大嘅事件都有用處，可以攞嚟做背景故仔（backstory）等嘅用途。舉個例說明，想像一個奇幻故仔：主角係一隻吸血鬼，佢生存咗成幾百年嘅時間，試過 10 次同人類結婚，次次都係打後佢伴侶因為人類壽命短過吸血鬼而死先；到咗故仔開始嗰陣，「同一個人結婚，再等個人死」呢件事對主角嚟講重複咗 10 次，所以佢對結婚經已冇嗮感覺（佢嘅背景故仔）；個故仔講述嘅係佢第 11 段婚姻，而呢段婚姻令佢好刻骨銘心（前 10 段婚姻可重複性，第 11 段婚姻不可重複）－噉就表示第 11 段婚姻好唔尋常、好有重大性，好值得攞嚟做故仔講[14]。

講故仔嘅媒介[編輯]

一班人喺度拍戲；佢哋用好多架生。
睇埋：講故、文學、漫畫、電影、電視劇、電子遊戲同埋舞台藝術

故仔呢家嘢可以用好多唔同媒體講[15]：

  • 傳達故仔最直接嘅方法係用口講：有學者指，口講故仔呢家嘢可以追溯到公元前 8,000 年嘅中石器時代[16]；而無論古今中外，世界各地嘅人都有講故嘅傳統，大人會講故仔俾細路聽，將先人嘅事蹟傳達俾下一代知，仲會用故仔教授各種人生智慧，例如寓言就係指一啲明確噉用嚟教人生哲理嘅故仔[17]。
  • 故仔可以用文字表達：文學泛指俾人定性為有藝術價值嘅文字作品，包括用文字寫出嚟嘅故仔；喺多數人都唔識字嘅古代社會，文學故仔好多時都係上流社會專享嘅，但因為大受歡迎而廣傳嘅口傳故仔成日都會俾後人輯錄成書，成為文學嘅一部份，例如歐洲嘅童話故事就係噉[9][18]。
  • 故仔又可以用一連串嘅定格圖像（好多時但唔一定）加埋一定量嘅文字表達：漫畫呢種講故仔方法喺廿世紀前經已存在，到咗廿世紀中開始盛行於全世界；漫畫嘅製作結合咗作故仔同畫畫，所以漫畫家係一種講求高技術嘅工作－漫畫家既要識作故仔，同時又需要識畫畫同美術設計[19]。
  • 故仔又有得用影片表達：一段片分做若干個鏡拍（shot），每個鏡拍係一段冇間斷嘅片，可以用嚟展示某啲事件，於是一大柞鏡拍砌埋一齊就可以表達一個完整嘅故仔；呢種故仔表達方法喺電影、電視劇以及電子遊戲等嘅媒體當中都會見得到[20]。
  • 故仔仲有得用音樂同舞蹈表達：喺各種嘅舞台藝術當中，表演者會著住特製嘅服裝、企喺有佈景嘅舞台上，用某啲方式描繪所飾演嘅角色[21]－喺大戲同歌劇入面，演員會用唱嘅方式講出所演嘅角色嘅所思所想[22]，而喺芭蕾舞（ballet）當中，舞蹈員就會配合音樂跳舞，用表情同動作表達所演嘅角色嘅情感[23]。

... 等等。

唔同媒體嘅比較[編輯]

新嘅講故仔媒體往往能夠做到一啲舊媒體做唔到嘅效果，但又會為作故仔嘅人造成新嘅挑戰：口講同文學係最古老嗰兩種講故仔方法，而漫畫同電影等嘅媒體自從喺廿世紀崛起之後就一路都大受歡迎；口講同文學以外嘅講故仔媒體可以做到一啲齋用語言文字好難做到嘅效果，例如：

  • 喺畫一個漫畫作品或者整影片嗰時，作者可以喺其中一格嘅背景嗰度留低一啲就噉睇好似無關痛癢嘅隱晦線索（例如係其中一個角色間房牆上面掛住嘅一幅舊相，透露個角色嘅過去），但如果個故仔用語言文字講，作者一定要開口講明嗮所有嘢，好難向讀者傳達一啲資訊得嚟又唔令讀者即刻留意到份資訊[24]。
  • 電子遊戲係一種有互動性（interactive）嘅媒體－觀眾（即係玩家）能夠有主導權。一種常見嘅電子遊戲講故技巧係，製作組喺遊戲世界入面收埋一啲資訊，等玩家自己發掘，例：喺遊戲地圖其中一間比較難搵嘅房入面有幅相，玩家用佢操控嗰個角色去讀嗰幅相會睇到一幅圖像，而呢幅圖像揭示咗故仔入面某個角色嘅過去（即係透露嗰個角色嘅背景故仔）－令玩家可以自己去發掘個遊戲世界嘅故仔，而且又間接可以鼓勵玩家去探索個遊戲世界[25]。

另一方面，口講同文學以外嘅講故仔媒體往往又需要更多唔同嘅技術：要作出好嘅漫畫，作者唔淨只要識得作故仔，仲要識畫畫同美術設計，能夠畫出似樣嘅圖像同設計出讀者會鍾意嘅角色外形，相比之下喺寫文學作品嗰陣，作者頂櫳都淨係需要用文字描述吓角色嘅外形，再等讀者自己想像就得[19]；而製作影片就成日要用到電腦圖像同電腦動畫等複雜嘅技術，而寫文學作品喺技術上相對簡單－淨係需要作者識得寫字打字[26]。

敘事元素[編輯]

哈利波特嘅主角哈利仔；佢嘅決策同行動帶動咗個故仔嘅發展。
內文：敘事元素

一個故仔正路會有齊呢啲敘事元素（narrative elements）：角色、背景設定、情節，而呢啲元素又會配合同一個主題[6]。

角色[編輯]

內文：角色

一個角色（character）係故仔入面一個具有能力作出行動同決策嘅個體。一個角色可以係一個人類，又或者第啲有智能嘅非人類個體，「有智能非人類個體」嘅例子有常見於科幻故仔嘅有智慧機械人以及常見於奇幻故仔嘅高扁同精靈等類人生物。角色可以按重要性分做主角（protagonist；成個故仔最重要嗰個角色，個故仔大部份時間都係由主角嘅觀點睇嘢嘅）、配角（supporting characters；有一定重要性，但冇主角咁重要嘅角色）、同埋對立角色（antagonist；同主角起衝突嘅角色，好多時但唔一定係一個奸角）等多個類別[7]。

角色喺一個故仔入面扮演咗主導性嘅作用，因為佢哋嘅目的（goal）主宰咗好多嘢[7][27]：

  • 每個有返咁上下重要嘅角色都會有某啲明確嘅目的，而一個角色嘅目的以及達到目的而做嘅行動會決定讀者對佢嘅觀感；例：奇幻小說《哈利波特》（Harry Potter）當中嘅黑魔王佛地魔（Lord Voldemort）目的係想要得到黑暗力量（目的），佢願意為求呢個目的殺同傷害好多無辜嘅人（為達到目的而做嘅行動），所以多數讀者都會覺得佢係奸角，會希望主角哈利能夠打低佢（讀者觀感）[27]。
  • 唔同角色之間喺目的上嘅矛盾會引致佢哋之間產生衝突，而呢啲衝突往往係成個故仔最引人入勝嗰部份；有啲敘事學同文學方面嘅學者仲主張，人睇故仔基本上就係為咗「睇衝突」[28]；例：校長鄧不利多（Dumbledore）想要保護霍格華茲魔法學校以及學校嘅學生（鄧不利多嘅目的），而呢點令佢同願意為咗得到力量而傷害學生嘅佛地魔（佛地魔嘅目的）作對，於是兩人之間就起衝突，衝突令佢哋（例如）打交，而戰鬥往往係一個故仔最好睇嘅部份（吸引讀者嘅衝突）；
  • 衝突會為牽涉喺其中嘅主角造成各式各樣嘅難關，而克服呢啲難關會令主角同佢嘅朋友成長或者有所變化；例：哈利初頭係一個天真嘅細路，但隨住佢同佛地魔以及其他角色嘅爭鬥（好似係目擊佛地魔殺死佢其中一個朋友），佢變得更加成熟－決策同行動嘅方式起咗變化[29]。

背景設定[編輯]

內文：背景設定

背景設定（setting）指個故仔發生嘅時間同地點。背景設定可以係真實嘅，但又可以係虛構嘅：有好多故仔都係設喺貼近現實嘅世界，但又有好多故仔設喺架空世界，而架空世界係某啲文類嘅重點，例如哈利波特係一個相當出名嘅奇幻故仔，背景設定係一個架空版本嘅廿世紀尾英國（基本上似廿世紀尾嘅英國，但就係一個有魔法嘅世界）。背景設定喺一個故仔當中扮演咗重要嘅作用：背景設定幫讀者觀眾理解個故仔所發生嘅時空嘅物理性質、自然環境、社會文化、個世界嘅歷史、以及有啲乜重要地點呀噉，間接為「每個角色可以採取乜行動」設立一啲界限，例：喺一個設定咗為冇魔法嘅故仔世界當中，作者唔可以講個主角用咒語解決困難[30]。

喺敘事學上，世界創建（world building）指透過故仔描繪一個虛擬世界嘅過程，喺科幻同奇幻等將角色置身喺架空世界嘅文類裏面零舍重要。作故仔嘅人要思考個故仔嘅世界嘅物理法則係點（等個故仔雖然有魔法呢啲超自然元素，但依然有理可循）、自然環境係點（奇幻故仔嘅作者好多時仲會幫自己個架空世界畫地圖，例子有魔戒）、社會文化係點（例：同現實世界比起嚟，有冇乜唔尋常嘅傳統習俗或者價值觀）、歷史（例：「500 年前，高扁族同精靈族曾經打過一場大仗，雙方死傷慘重，從此兩族誓不兩立，到咗今日都仲係噉」）、以及有乜特色地點（例：霍格華茲魔法學校係一間歷史悠久嘅魔法學校，係哈利要去返學嘅地方）。喺做完世界創建之後，作者仲要諗計有技巧噉將呢啲資訊傳達俾讀者知（而唔係直接講），透過角色嘅言行同背景事物等向讀者透露個故仔世界發生過嘅事（例：哈利波特嘅多位配角一講到佛地魔就聞之色變，佢哋嘅恐懼情緒令讀者知道，佛地魔呢個角色同哈利波特世界一啲好得人驚嘅歷史有關）[31]。

霍格華茲魔法學校嘅模型；做得好嘅世界創建能夠造出讀者嚮往嘅虛構世界，令個故仔更加引人入勝。

情節[編輯]

內文：情節
睇埋：起承轉合

情節（plot）係指個故仔所包含嘅連串性事件，一件事件會引致下一件（so...），最後帶到去高潮（climax）同結局（ending），而每個情節係要有返咁上下重要嘅，段段都會對打後發生嘅事產生具體影響：喺一開始嗰陣，讀者觀眾理應要對角色同背景設定有基本理解（如果佢哋睇完第一個章節之後仲未有噉嘅理解，好多時表示作者作得唔好）；每一件事件都會涉及啲角色（喺背景設定嘅限制下）作出一啲決策同行動，一件事件會引致跟住嘅事件發生，而角色同背景都可以因為重大嘅事件而起變化；例：一場決定生死嘅戰鬥令主角身心受創，而佢所受嘅創傷會係佢角色發展嘅一部份，亦會影響佢打後嘅決策同行動；黑魔王佛地魔嘅復活令魔法世界嘅人提高警戒，而啲人提高警戒會影響霍格華茲魔法學校嘅佈置同氣氛（啲人緊張咗、保安多咗等等）[32][33]。

Plot v. story en.png

一個故仔嘅情節可以好簡單，但又可以好複雜：喺最簡單嗰種情況下，一件事件會影響下一件，而每件事件只會受佢打前嗰件影響；但複雜啲嘅故仔會有更多錯綜複雜嘅情節關係，舉個簡單例子，可能主角喺第一件事件當中幫過一個路人（呢一段同時展示佢心底係一個好人），而喺幾件事件之後，佢又撞返嗰個路人，個路人因為感恩而幫返佢，而呢樣嘢對主角喺嗰件事件當中解決難關扮演重要作用－一件事件嘅影響喺幾件事件之後先出現[33]。

主題[編輯]

內文：文學主題

喺敘事學上，主題（theme）係指喺一個故仔嘅唔同元素當中都存在嘅一啲諗頭[34]。想像一個噉嘅科幻故仔[35][36]：

  • 背景設定：個故仔設喺一個未來世界；喺呢個世界入面，神經科學、機械人學、同人工智能等方面嘅技術經已極之發達，人可以輕易噉用機械部件取代自己啲手手腳腳以及身體大多數嘅器官，甚至乎將自己嘅記憶同思緒好似電腦檔案噉複製同傳送；同時，人工智能機械人變得愈嚟愈複雜，呢啲機械人識得做各種嘅認知功能，甚至乎能夠表達情感。
  • 角色：主角係一個特務，佢同佢嘅同袍為咗令自己戰鬥能力更勁而身體完全機械化咗，全身上下得個腦仲係有血有肉嘅組織；另一方面，先進嘅人工智能技術終於創造出一個極其聰明、有自我意識嘅人工智能－呢個人工智能近乎有齊嗮人類有嘅認知能力同情慾。
  • 情節簡介：呢個人工智能同人一樣，自認自己係一個心靈，想要延續自己嘅存在，唔想俾人類任意操控同刪除佢（目的），於是就密謀作反，用佢嘅高超智能反過嚟操控佢接觸到嘅人類，例如用神經技術將假記憶植入周圍嘅人類嘅腦入面，等呢啲人類做佢想佢哋做嘅嘢（目的引致嘅行動）；同時，身為特務嘅主角同佢同袍俾上頭委派去調查呢個人工智能所犯嘅案－就自然同個人工智能起衝突。

呢個故仔嘅各個元素都令讀者觀眾諗起「人同機械之間條界線係乜？」、「一個個體要點先算係有心靈？」等嘅問題，而呢啲都係喺人工智能哲學同心靈哲學上廣受關注嘅問題－於是個故仔就有咗個主題[35][37]。敘事學上一般認為，發人深省嘅主題能夠令一個故仔更加有趣[34]。

敘述[編輯]

內文：敘述

敘述（narration；動詞：to narrate）係指用某啲符號－語言同文字等－向觀眾傳達一個故仔嘅舉動。一個故仔可以用多種唔同媒體－口講、文字、影片等等－敘述，唔同敘述媒體都會吸引到唔同嘅讀者羣，而且就算係同一種媒體，都有好多唔同手法表達同一段故仔，例：一個作家喺用文字寫低一段故仔嗰陣，佢要作出「用幾多篇章描述角色嘅表情」、「用乜字眼描述佢哋嘅表情」、「用幾多篇章描述個背景」、同「用乜字眼描述個背景」等等嘅決策，而呢啲決策可以影響讀者嘅反應（例：有學者認為，寫到令讀者能夠輕易喺腦入面想像件事件係出色作家嘅一個特徵[38]）。所以喺文學創作等嘅領域上，敘述技巧係一個廣受關注嘅課題[39]。

喺決定「要點敘述一個故仔」嗰陣，講故仔嘅人（尤其係用文字講故仔嘅人）要度嘅嘢有以下呢啲[39]：

敘述觀點[編輯]

敘述觀點（narrative perspective）係指講故仔嗰個人相對於個故仔世界嘅位置。根據俄羅斯文學評論家波里斯·烏斯班斯基（Boris Uspensky），敘述觀點可以按幾大準則分類[40][41]：

  1. 空間（spatial）：指講故人處於故仔嘅空間邊忽－有啲故仔用第一人身講（講故人就係主角；「當日，我正喺度打緊波...」），又有啲故仔係講故人身處喺故仔世界入面、但唔係主角（「當日，我望住拉爾夫喺度打波...」），亦有故仔係講故人完全置身喺故仔世界外嘅（「當日，拉爾夫喺度打緊波...」）；有作家認為，用第一人身講嘅故仔－由主角嘅角度寫個故仔－零舍能夠令讀者投入，但呢個諗法唔係人人都認同[42]。
  2. 時間（temporal）：指講故嘅時間同件事發生嘅時間差幾遠；喺現代嘅西方文學當中，作品嘅時態多數係過去式或者現在式，例如正話提到嘅哈利波特小說系列就係用過去式寫嘅，好似作者喺度回想緊以前發生嘅事噉，不過亦有人覺得用現在式甚至將來式寫嘅作品有其引人入勝之處。
  3. 心理（psychological）：指講故人情緒上有幾抽離，例如有啲作家喺寫故仔嗰陣完全淨係客觀噉描述角色做緊乜同諗緊乜（「拉爾夫佢一嘢打到隻龍瞓咗喺度」），但又有啲作家會喺寫故仔嗰陣加入對角色做緊嘅嘢嘅評價（「拉爾夫佢一嘢打到隻龍瞓咗喺度，佢真係又好打又靚仔」）－後者呢種情況喺用第一人身寫嘅故仔當中特別常見，俾作者用嚟展現主角嘅思考方式[41]:p. 201 - 202。
  4. 措辭（phraseological）：指講故人用嘅措辭，例如講故人點樣稱呼啲角色－「拉爾夫佢喺度睇緊書」同「拉爾夫先生佢喺度睇緊書」，喺前者嘅情況下，講故人同主角似係相熟嘅，而喺後者嘅情況下，講故人同主角似唔係咁熟或者似講故人有少少專敬個主角[40]。

多角度敘事[編輯]

內文：多角度敘事

多角度敘事（multiperspectivity）係指一個作品入面用多個唔同嘅敘述觀點嚟敘述個故仔：以廿世紀尾嘅西方文學為例，喺呢啲文學作品當中，小說多數都係由頭到尾用同一個觀點敘述嘅，即係由頭到尾都係由主角角度講故仔或者由頭到尾都由同一個角色嘅角度講，但又有好多小說係會喺中途改變敘述觀點嘅。多角度敘事小說嘅出名作品有《冰與火之歌》（A Song of Ice and Fire）：呢個系列嘅奇幻小說描繪一個好複雜嘅世界，個世界同現實世界一樣，有好多人喺入面，當中對故仔發展有返咁上下重要嘅角色有成幾廿個咁多，個小說系列嘅每個章節都以某個角色嘅名開頭，表示「以下呢個章節由呢個角色嘅角度敘述」；喺閱讀嘅過程當中，讀者能夠係噉轉換敘述觀點，睇到好多淨係得某個或者某班角色先至知嘅資訊，例：B 親眼目擊 C 同 J 呢兩個角色通姦，而呢件事深遠噉影響 C 同 J 及後嘅行動，但呢三個人以外嘅角色並唔完全知道發生緊乜事，最後多角度敘事令讀者對成個故仔嘅情節－好似係「點解呢個呢個角色會噉做」－有咗更深入嘅了解[43][44]。

有陣時，多個由唔同角度敘述嘅故仔可以設喺一個更大嘅故仔入面，例如大故仔入面有個角色喺度講好幾個唔同嘅故仔。呢個做法最出名嘅作品係《天方夜談》（波斯文：هزار و یک شب ）；喺呢個故仔當中，機智嘅女主角嫁咗俾個殘忍、鍾意處死人嘅皇帝；但女主角晚晚講故仔俾個皇帝聽，而且晚晚都係喺瞓覺時間講到個故仔嘅高潮同結局之前，令個皇帝因為想繼續聽故仔而唔殺佢，最後佢講咗一千零一夜嘅故仔－一千零一夜嘅故仔個個主角都唔同，共同點係設咗喺同一個大故仔裏面[45]。

大眾文類[編輯]

內文：大眾文學 同 文類

故仔同敘事體可以按好多唔同準則分做多個文類（genre）。大眾文學（genre fiction）一般會按偏好嘅橋段分做科幻（故仔內容有想像出嚟嘅先進科技）、奇幻（故仔內容有魔法等超自然力量）以及恐怖（故仔重視令讀者覺得驚）等嘅體裁[46]；呢啲體裁有得進一步分子文類（subgenre），例如科幻就有得細分做軟科幻同硬科幻兩種－前者指故仔入面先進科技完全係老作嘅，而後者就係指故仔啲先進科技真係有現實基礎、科學上準確嘅[47]；而且一個故仔仲可以同時屬多過一個文類－例如一個故仔可能講科學家用先進嘅遺傳工程技術整恐怖異形，噉呢個故仔會同屬科幻同恐怖兩個文類[48]。

每個文類喺「能夠引起邊啲人共鳴」上都有差異。所以靠作同賣故仔嚟搵食嘅人－作家、編劇、同出版商等－喺整好一個故仔之後，會講明個故仔屬於邊個（或者邊幾個）文類，而呢樣嘢會影響（例如）一本小說喺書店擺邊個書架或者喺網講網站擺邊個類別呀噉，方便讀者按文類搵自己比較有可能會鍾意嘅作品。故仔可以先分成虛構故仔同非虛構故仔，然後再分成各種文類[48]。

科幻[編輯]

一個 1906 年嘅科幻故仔嘅圖畫；舊嘅科幻故仔當中想像嘅科技好多時幾廿年後嘅人望到會覺得好老土。
內文：科幻

科幻（science fiction，簡稱 SF）係最重要嘅虛構故仔文類之一。廿一世紀初敘事學學界對科幻嘅定義未有一致共識，不過一般嚟講，科幻故仔背景設定會設於未來嘅世界，會有一啲（由作品出嘅年代嘅角度睇）極先進嘅科技；喺主題上，好多時都會集中於一啲當代有關科學同科技嘅哲學問題；常用嘅橋段包括咗似人嘅人工智能（呢啲 AI 可以係對人類友善，但又有可能想對人類不利）以及機械人等等[48][49]。

對於科幻呢個文類係點定位，廿世紀美國科幻大師阿西莫夫（Isaac Asimov）就噉講[50]：

「
原版英文："Science fiction can be defined as that branch of literature which deals with the reaction of human beings to changes in science and technology."

粵文翻譯：科幻可以定義為文學當中專門應付人對科學同科技上嘅改變嘅反應嘅嗰一個分枝。

」

而人稱「科幻先生」（Mr. SF）嘅美國科幻作家羅拔海萊因（Robert A. Heinlein）就噉講[51]：

「
原版英文："A handy short definition of almost all science fiction might read: realistic speculation about possible future events, based solidly on adequate knowledge of the real world, past and present, and on a thorough understanding of the nature and significance of the scientific method."

粵文翻譯：一個能夠簡短噉概括幾乎所有科幻作品嘅定義望落係噉嘅：對未來事件嘅真實性預測－呢啲預測係穩陣噉建基於有關現實世界以及過去同未來嘅知識，同埋建基於對大自然同科學方法嘅重要性嘅完整理解。

」

科幻有得細分做多個子文類。其中一個常見分法係按真實度分做軟科幻（soft SF）同硬科幻（hard SF）兩種：

  • 軟科幻指故仔入面嗰啲先進科技完全係老作嘅，根本冇現實基礎可言，而且好多時故仔內容科學上唔準確（例如連物理法則都搞唔清），出名作品有《星空奇遇記》（Star Trek）同《星球大戰》（Star Wars）等－呢啲作品有星際航行等主題，但喺科學上並唔準確，而且含有超自然成份，好似係星戰嘅當中嘅原力[47]；
  • 硬科幻啱啱相反，指個故仔入面啲先進科技真係有現實基礎，甚至乎直頭係當代科學界正喺度研究緊嘅嘢，而且故仔內容盡可能做到合乎當代嘅科學，出名作品有《攻殼機動隊》（Ghost in the Shell）－呢個作品當中出現嘅先進科技真係當代重視嘅技術，而且主題仲涉及對當代科學問題嘅思考[52]。

奇幻[編輯]

一個騎士喺度同隻西洋龍戰鬥；西洋龍係西方奇幻故仔入面常見嘅角色。
內文：奇幻

奇幻（fantasy）係另一個重要嘅虛構故仔文類，成日俾人攞嚟同科幻對比。喺背景上，奇幻故仔設喺虛構嘅世界，會有一啲現實世界冇嘅超自然力量或者同現實世界唔同嘅物理法則（例如係魔法嘅存在）；喺角色上，奇幻故仔往往會涉及一啲神話傳說當中嘅生物，包括高扁、精靈、以及西洋龍等，甚至乎係作者自己想像出嚟嘅生物。奇幻故仔零舍睇重世界創建－喺作奇幻故仔嗰陣，作者往往會好俾心機建構佢哋心目中嘅魔幻世界，例如《魔戒》嘅作者就認真到為自己諗出嚟嘅魔幻世界整咗地圖，描述佢個世界係點嘅（而且佢唔係唯一一個噉做嘅奇幻作家），仲要度埋呢個魔幻世界嘅物理法則同現實世界有乜分別，以及呢個世界嘅魔法點用（要令讀者覺得個故仔有理可循）等嘅問題[53]。

奇幻係一個充滿幻想嘅文類，而美國奇幻大師佐治·R·R·馬田（George R. R. Martin）就噉樣描述奇幻文學[54]：

「
原版英文："Fantasy is silver and scarlet, indigo and azure, obsidian veined with gold and lapis lazuli. Reality is plywood and plastic, done up in mud brown and olive drab. Fantasy tastes of habaneros and honey, cinnamon and cloves, rare red meat and wines as sweet as summer. Reality is beans and tofu, and ashes at the end."

粵文翻譯：奇幻（嘅世界）係銀同猩紅、靛青同天藍、帶有金同青金脈嘅黑曜岩。現實（嘅世界）係膠合板同塑膠，用泥啡同單調橄欖色砌出嚟。奇幻陣味似夏灣拿辣椒同蜜糖、肉桂同丁香、一分熟嘅紅肉同好似夏天一樣咁甜美嘅紅酒。現實係豆同豆腐，最尾就得灰燼。

」

奇幻文學係一個大類，底下仲有好多子文類。其中一個將奇幻分類嘅做法係按「個虛構世界有幾虛構」分做古典奇幻（high fantasy）同當代奇幻（contemporary fantasy）等嘅類別：

  • 古典奇幻背景設於高度虛構嘅世界，個故仔世界具有獨立於現實世界嘅物理法則（但自身喺物理上內在一致）同地點[55]；古典奇幻嘅出名作品有《魔戒》（Lord of the Rings）同由佐治·R·R·馬田作嘅《冰與火之歌》（A Song of Ice and Fire），以冰與火之歌為例，冰與火之歌舞台主要設於維斯特絡（Westeros）呢個虛構嘅大陸（作者有為維斯特絡畫咗多幅地圖），喺呢個特殊嘅奇幻世界當中，一個季節閒閒地可以維持成幾年咁耐嘅時間，而個故仔開始嗰陣啱啱係維持咗近乎十年嘅夏天就嚟結束（同現實唔一樣嘅物理法則），維斯特絡以北嘅地方長年積雪（特色地點），而且有某啲得人驚嘅類人生物喺嗰度，等緊冬天來臨嘅機會侵略維斯特絡（衝突）[56]。
  • 當代奇幻背景都係設於虛構嘅世界（定義上屬奇幻），但個虛構世界同作者身處嘅世界好相似，除咗可能有魔法之外，基本上同現實世界冇乜大分別，而且故仔會出現現實世界嘅地點；當代奇幻出名嘅作品有《哈利波特》（Harry Potter）－哈利波特背景設於一個虛構版本嘅廿世紀尾英國，呢個英國同現實嘅英國冇乜大分別（而且故仔仲有提及現實英國嘅地點），但就係有魔法同魔法生物嘅存在[57][58]。

恐怖[編輯]

鬼結合咗死亡、黑暗同未知，係恐怖故仔常用嘅橋段。
內文：恐怖故仔

恐怖（horror）係一個以恐懼做中心嘅文類。恐怖故仔喺背景設定、角色、同情節好多變，但重點都係在於要將主角置身喺令人覺得恐怖嘅處境當中，目的係令讀者有驚嘅感覺。恐怖文學源於宗教同民間故事：古代嘅宗教成日會用恐怖嘅景象嚟形容做壞事嘅人嘅下場，例子有天主教對罪人落咗地獄之後所受嘅折磨繪聲繪影嘅描述；而民間故事就往往源於人對佢哋唔了解嘅自然現象嘅恐懼。恐怖故仔通常做法係利用人嘅各種原始恐懼－即係死亡、黑暗、同未知等人本能上會驚嘅事物－迫故仔主角面對呢啲嘢，而且好多時透過展示主角點克服呢啲恐怖嘅事物，等讀者有所共鳴同領悟[59][60]。

恐怖故仔可以按多個準則分做子文類[59]：

  • 哥德式恐怖（Gothic horror）係一種「結合恐怖、死亡同浪漫」嘅體裁。哥德式恐怖源自 18 世紀嘅英格蘭，受到當時盛行歐洲文壇嘅浪漫主義影響，鍾意觸及人對未知事物嘅恐懼，用 macabre 等嘅美學，仲會加入同當代社會結構相關嘅主題，例如貴族就係哥德式恐怖常見嘅元素，而傳統上同歐洲貴族相關嘅城堡同哥德式建築等嘅嘢亦都自然跟住成為哥德式恐怖常用嘅橋段。被指為哥德式恐怖嘅作品有 1897 年出嘅小說《德古拉》（Dracula）[61]。
  • 肉體恐怖（body horror）指靠人體嘅變異令讀者覺得驚嘅恐怖故仔，例子有日本漫畫家伊藤潤二嘅多部作品[62]；喺肉體恐怖故仔入面，啲角色嘅身體會經歷一啲恐怖嘅異變（呢啲異變可以、但唔一定因為超自然力量而起嘅），例如係身體俾怪獸寄生而變形、手腳俾人斬斷、或者身體俾神秘力量影響而監生腐爛呀噉。呢啲作品往往令讀者同時有恐懼同作嘔嘅感受[63]。
  • 宇宙性恐怖（cosmic horror）係指透過展示人嘅微不足道令讀者覺得驚嘅恐怖故仔，例子有美國作家 H. P. 洛夫卡拉夫特（H. P. Lovecraft）嘅作品。喺呢啲故仔入面，威脅主角生存嘅力量係一啲規模極宏大嘅事物，例如係一個外形極古怪、身體好似星球咁大、力量無邊、而且當人類係玩具噉玩嘅神，呢個神用各種方法玩弄主角，將啲恐怖靈異生物逐一派去殺主角，而喺主角辛苦一輪逃離啲生物嘅追殺之後，個神淨係笑咗笑，再不費吹灰之力一吓殺死主角－令讀者感覺到人係幾咁微細同無力[64]。

犯罪[編輯]

福爾摩斯嘅圖畫
內文：犯罪故仔

犯罪（crime）係指以犯罪同法律為重心主題嘅故仔。犯罪故仔背景設定可變（不過主流係設喺當代社會），主角偏向會係警察或者偵探等嘅人物（即係會以「解決一單罪案」為目的嘅人），情節會涉及某啲有返咁上下嚴重嘅罪案（例：謀殺）。有學者認為，人對犯罪故仔嘅興趣源於佢哋對反社會嘅人嘅又恨又好奇－好奇，所以先會想透過睇同呢啲人有關嘅故仔，知多啲有關佢哋嘅嘢[65]。

犯罪故仔係一個比較公式化嘅文類：喺一個典型嘅犯罪故仔入面，作者首先會以一啲濕碎嘅嘢開頭，例如係主角返工嘅一日，靠呢啲濕碎嘢發生嗰陣啲角色之間嘅對話、流露嘅情緒、同行為，俾讀者對呢班角色同背景設定有基本嘅了解；然後做個故仔重心嗰單罪案就會發生，而主角同其他重要嘅角色會涉及喺單案嘅調查當中，而喺調查期間往往會有角色發展－例如喺調查一輪之後，啲線索引領主角去到一個佢朋友唔願意去嘅地點，呢個地點提供咗新線索，同時主角個朋友終於講出佢點解唔願意去呢個地方，而呢場對話揭示嗰個角色一啲不堪嘅過去；最後結局通常係破案，拉到個犯人，不過都有好多犯罪故仔講最後犯人都係走甩嘅[66][67]。

犯罪故仔有以下呢啲子文類：

  • 偵探故仔（detective fiction）係犯罪故仔嘅一個子文類，主角係－專業、業餘、或者退咗休嘅－偵探，負責去查一單案；偵探故仔嘅異型舖排如下：主角同若干個角色出場，做一啲相對濕碎嘅嘢，等讀者對佢哋有基本嘅了解；跟住罪案發生，在場嘅眾人每個都有嫌疑；主角會由各人身上攞口風同搵證據；最後主角憑住佢嘅推理，搵出犯人係邊個。偵探故仔出名嘅作品有《福爾摩斯》（Sherlock Holmes）同《名偵探柯南》等[68]。
    • 密室推理（locked-room mystery）係偵探故仔一種，廣義上係指個故仔嗰單案（幾乎一定係謀殺）就噉望落好似係冇可能做得到嘅；最簡單嘅例子係，眾人喺一間房入面發現其中一個角色死咗，間房道門係由入面鎖住咗嘅，而且間房冇任何其他出口（密室）－即係話就噉睇，犯人冇可能可以殺死個受害人再離場同鎖起道門[68]。
  • 法證故仔（forensic crime fiction）係犯罪故仔嘅一個子文類，主角係法證相關嘅人員，唔係好似用偵探故仔啲主角噉齋靠推理，而係使用法證上嘅技術（例如驗屍等）嚟搵出犯人[69]。

愛情[編輯]

內文：愛情故仔

愛情（romance）係另一個有影響力嘅虛構故仔文類。定義係故仔內容集中於講兩個人之間嘅浪漫關係；角色設定上，故仔實會有兩個主角，通常（但唔一定）係一男一女；背景設定視乎子文類而定－當代愛情故仔設喺作者身處嘅世界，奇幻愛情講嘅故仔係設喺奇幻世界入面嘅浪漫關係，而科幻愛情講嘅故仔就設喺未來世界嘅浪漫關係，主題好多時涉及科技點影響人嘅浪漫關係... 等等；情節上，愛情故仔通常集中於兩個主角點樣克服佢哋喺段關係當中遇上嘅難關（例如係父母反對），最後有情人終成眷屬[70]。

  • 當代愛情故仔（contemporary romance）係指背景設於作者身處嘅時代嘅愛情故仔，係愛情故子當中最大嗰類，出名嘅作品有 1813 年出嘅《傲慢與偏見》（Pride and Prejudice），呢個作品圍繞英國鄉紳貴族嘅成長同感情問題（作者身處嘅時代），故仔講男女主角分別性格上有缺點－男主角為人高傲、女主角容易對人評頭品足同產生偏見（角色以及衝突嘅可能性），但及後同對方相處之後，學識克服自己嘅缺點，最後成婚。傲慢與偏見呢個作品有陣時因為設喺 19 世紀早期而俾人分類做古代愛情故仔，但原則上，因為個故仔設於作者身處嘅時代，所以算係當代愛情故仔[71][72]。
  • 超自然愛情故仔（paranormal romance）係指故仔當中涉及超自然元素嘅愛情故仔，出名作品有《吸血新世紀系列》（Twilight），吸血新世紀故仔講一個十零歲嘅人類後生女愛上咗一個成 104 歲嘅吸血鬼，呢個吸血鬼屬一個飲動物血唔飲人血嘅吸血鬼家族，及後有第個吸血鬼家族嘅成員嘗試傷害女主角（衝突）。呢個故仔屬愛情故仔，因為情節集中於男女主角嘅戀愛關係，但涉及吸血鬼呢個超自然元素[73]。
  • 愛情故仔係古典芭蕾舞劇當中最常見嘅故仔類型。好似係舉世聞名嘅《天鵝湖》（Swan Lake）噉，天鵝湖取材自俄羅斯嘅民間故事，唔同版本嘅天鵝湖喺幕嘅鋪排、編舞、同埋某啲情節等各方面有所唔同，但共通點係故仔上會跟返個大方向：多數版本嘅天鵝湖有三至四幕，第一幕講王子開舞會慶祝生日，俾母后催佢結婚，王子因為噉覺得唔開心，跟住決定同佢朋友去湖邊打獵散心；第二幕就講王子去到湖邊，差啲想搵箭射隻天鵝嗰陣，見到嗰隻天鵝變咗做個公主，得知公主受邪惡魔法師詛咒，變咗做天鵝，喺某啲時間先可以化做人身，兩個人然後仲鍾意咗對方；喺跟住落嚟嗰一到兩幕當中，邪惡魔法師會嘗試阻礙兩人嘅戀情。最後結局視乎版本而定－有啲版本大團圓結局，講王子同公主最後合力打低邪惡魔法師解開詛咒，又有啲版本係悲劇收場，講公主俾邪惡魔法師捉走變唔返做人。成齣芭蕾舞劇個故仔重點都係在於王子同公主之間嘅戀情[74]。
《天鵝湖》王子同公主共舞嘅一幕；芭蕾舞係一種靠舞蹈同音樂敘述故仔嘅藝術－舞蹈員唔講嘢，齋靠跳舞嘅表情同動作表達飾演嘅角色，配以適當嘅音樂同佈景，向觀眾傳達故仔嘅情節。

非虛構文類[編輯]

非虛構故仔（nonfiction；指故仔內容係真實發生嘅事）都可以分多個文類，例如[75]：

  • 旅遊文學（travel literature），作者紀錄自己旅行遇到嘅事；
  • 回憶錄（memoir），作者寫出自己嘅一啲記憶片段；
  • 自傳（autobiography），作者寫自己生平發生嘅事

... 等等。

社科研究[編輯]

法國聖但尼大教堂嘅有色玻璃描繪聖經入面嘅一個故仔。宗教建築成日會用建築物上嘅裝飾講故仔－故仔喺好多文化產物當中都見得到[76]。
睇埋：文化進化

故仔係人類意識嘅重要一環：無論喺世界乜嘢地方，人都有「用故仔象徵自己身份」嘅行為－佢哋會以故仔嘅形式，記住自己經歷過嘅嘢，並且將呢啲故仔當做自己身份認同嘅一個部份；而自古以嚟，故仔一路都係文化一個不可或缺嘅組成部份，俾人用嚟表達佢哋自己嘅經歷或者想像力－講故係最早期嘅娛樂之一，各種嘅文化產品都有故仔喺入面（文學好多時都係講故仔、多種嘅舞台藝術都係用音樂舞蹈講故仔、電視劇同戲又係講故仔... 等等），而呢啲文化產物對社會嘅運作以及文化進化（cultural evolution；指社會同文化隨時間好似生物進化噉演變）有深遠嘅影響。所以了解人建構、欣賞、同傳播故仔嗰時跟嘅規律－呢啲嘢正係敘事學嘅研究重點－對多種人文同社會科學領域嚟講都有價值[77][78]。

概念化[編輯]

喺數學性嘅社會學（sociology）上，故仔可以定義為具有以下組成部份嘅事物[79][80][81]：

  1. 一個包括若干個「對世界 嘅狀態嘅描述」嘅集（set），呢個集嘅組成部份有一定按時間排嘅順序；
  2. 一個包括若干個行動個體（角色）嘅集 ；
  3. 一個包括若干個可能行動 嘅集；
  4. 同 嘅對應（邊個角色有邊啲可能行動）。

如果將上述嘅嘢畫做一幅圖，每個可能狀態（ 嘅每個元素）做一個節點（node），節點之間有箭咀，每個由 去 嘅箭咀 代表「 呢個行動會令個世界由 變成 」－最後會得出幅樹狀圖[79]。英國社會學家彼德·艾寶（Peter Abell）指出，一個故仔可以想像成頭先提到嘅樹狀圖上嘅其中一串因果連繫（casual link）－「 喺 令個世界進入 狀態，引致 」，「 喺 令個世界進入 狀態，引致 」... 等等，而「A 引致 B」大致上可以想像成「如果 A 冇發生，B 唔會發生」[82][83]。呢種用數學方法將故仔概念化嘅做法有相當嘅應用價值，例如係用嚟教人工智能理解甚至乎作故仔[84][85]。

跨文化現象[編輯]

講故仔似乎係人嘅天性：世界各地嘅人，不論文化同語言，都有講故仔嘅習俗；好多地區嘅人都會用講故仔嚟紀錄佢哋嘅共同體驗以及價值觀，所以一個族群嘅人之間相傳嘅故仔－包括口傳故仔同用文字寫低嘅故仔－好幫到手理解呢個族群，係人類學（anthropology）研究嘅重要材料；美洲土著就係出名嘅例子，呢啲土著好興用講故仔嘅方式將祖先嘅事蹟（帶有個部族嘅歷史）話俾啲細路聽，而且仲好興用故仔教授一啲人生道理（所以反映到個部族嘅價值觀），喺啲細路大個咗之後，佢哋聽過阿爸阿媽講嘅故仔往往會成為佢哋文化身份認同嘅重要一部份[86][87][88]，而且呢種身份認同嘅形成過程喺比較都市化嘅地區嘅人當中都見得到[89]。

一個老人家喺度讀故仔書俾細路聽。

教育作用[編輯]

睇埋：觀察學習

故仔能夠靠角色嘅行動同遭遇傳授價值觀。一個故仔實會涉及角色作出行動，佢哋嘅行動會引致某啲結果，而結果嘅好壞能夠用嚟教人生道理。好似係以下呢個嚟自一個美洲土著部族嘅故仔噉：喺個故仔入面，有個老女人唔肯接受佢個仔經已結婚同自立，成日走去煩佢個仔同新抱；有日，隔離部族嘅人入侵，個老女人聽到有人尖叫，以為係佢新抱喺度叫，於是走去大聲嗌佢個仔，諗住管佢個仔同新抱做緊嘅嘢（行動），結果佢嘅大嗌令入侵者知道佢嘅存在，最後搞到佢俾入侵者殺死（行動引致嘅結果）－呢個故仔俾個部族攞嚟教啲父母，喺仔女結咗婚自立咗之後就唔應該再成日管住佢哋（個部族價值觀嘅一部份）[90]。用類似噉嘅故仔教細路道理嘅做法由阿拉斯加到墨西哥嘅土著傳統當中都見得到[91][92]，而喺會用文字嘅族群入面仲可以見到寓言以一種文學體裁嘅型式出現[93]。

有人認為，用故仔教道理嘅做法之所以廣受採用，係因為用故仔有吸引力過齋講道理：道理好多時都係抽象嘅，而故仔可以攞嚟做抽象道理嘅具體例子，例：「唔好講大話」係一個抽象嘅道理，而《狼嚟喇》呢個故仔提供咗一個具體嘅例子，展示點解講大話唔好－講大話會搞到自己失去信譽，一旦自己真係需要幫手嗰陣，失咗信譽可以造成好慘嘅下場；除此，故仔有娛樂性，方便吸引細路坐定定聽大人講嘢[91]。

寫故仔嘅步驟[編輯]

18 世紀尾嘅一幅油畫；幅畫描繪嘅係一位坐喺書檯前面諗緊計嘅作家。
內文：寫作過程

寫作過程（writing process）係指一個作者寫出一個文學作品嘅過程，包括咗寫故仔。對於寫作過程應該點做，唔同學者有唔同睇法，而且唔同人會偏好唔同嘅做法[94]。不過西方文壇主流認為，寫作過程可以分做三大部份[95]：

  1. 前寫作（prewriting）：對角色、背景設定、情節、以及主題等嘅元素作出一個基本嘅計劃；喺呢個階段，作者往往會做一啲研究先，搜集吓有關個寫作題目嘅資料，例如寫人物傳記就要去耖吓有關主角生平嘅資料，而寫一個講人工智能嘅科幻故仔就要去學吓有關人工智能嘅知識先... 等等；而且作者往往要去睇吓之前嘅類似作品係點嘅，以免自己唔覺意作出咗一個類似打前作品嘅故仔；然後作者好多時就要將個故仔嘅題目集中啲，例如發現人工智能係個大題目，而佢個故仔預得 5,000 字長，唔會處理到嗮人工智能上嘅所有嘢，於是佢就改為將個科幻故仔嘅主題設喺某個人工智能議題嗰度；作者要諗出令讀者有共鳴嘅角色同有吸引力嘅設定，及後作者就要度清楚啲情節，包括每個情節大致上發生乜事，以及檢查吓啲情節係咪合理等等[96][97]。
  2. 寫作（writing）：作者要郁手整份原稿出嚟；作者要攞住前寫作階段度好嗮嘅嘢，再將啲情節逐一噉用文字等嘅方式表示出嚟。原則上，呢個過程應該係跟足嗮事先計劃好嘅情節嘅，但作者往往會突然諗到一啲新諗頭，所以會有少少隨興噉對之前計劃好嘅情節作出一啲更改，另一方面，作者好多時又會發現一啲前寫作階段冇發現到嘅問題。喺寫嗰陣，作者要留意 show, don't tell 嘅原則－意思係唔好好似寫大綱嗰陣噉，直接描述發生緊嘅事，而係描述身處故仔世界嘅人能夠睇到嘅影像、直接感知到嘅嘢同所採取嘅行動（「A 郁手打 B」可以寫做「A 舉起拳頭，再一嘢將個拳頭揮向 B 嘅面」、「A 叫 B 做嘢」可以寫做「A 向 B 講：『快啲郁手做嘢！』」）[98]。
  3. 修訂（revising）：喺搞掂咗份初稿之後，一般認為一個成功嘅作家往往會喺一段時間後返睇一次自己嘅作品，而喺呢個時候，佢通常會發現到一啲第一次寫嗰陣留意唔到嘅問題，於是會作出各種嘅修改－改吓啲字眼、要重新排過啲段落同句子、甚至發現一個之前注意唔到嘅情節漏洞（plot hole；指個故仔某啲情節之間邏輯上矛盾）呀噉，一路做到佢覺得滿意為止。如果係文字作品，作者會考慮嘅嘢包括：段字易唔易理解或者喺腦入面想像？段字有冇包含足夠嘅資訊？段字包含嘅資訊會唔會多得滯？情節嘅流動合唔合理？... 等等[99]。

睇埋[編輯]

文獻[編輯]

  • The Random House Dictionary of the English Language, New York: Random House, 1979, LCCN 74-129225.
  • Abbott, H. Porter (2009). The Cambridge Introduction to Narrative Second Edition. Cambridge: Cambridge University Press.
  • Abrams, M. H., & Harpham, G. (2011). A glossary of literary terms (PDF). Cengage Learning.
  • Bal, Mieke. (1985). Narratology. Introduction to the Theory of Narrative. Toronto: Toronto University Press.
  • Baldick, Chris (2004), The Concise Oxford Dictionary of Literary Terms, Oxford: Oxford University Press, ISBN 978-0-19-860883-7.
  • Carey, Gary; Snodgrass, Mary Ellen (1999), A Multicultural Dictionary of Literary Terms, Jefferson: McFarland & Company, ISBN 0-7864-0552-X.
  • Clandinin, D. J. & Connelly, F. M. (2000). Narrative inquiry: Experience and story in qualitative research. Jossey-Bass.
  • Didur, J., & Fan, L. T. (2018). Between Landscape and the Screen: Locative Media, Transitive Reading, and Environmental Storytelling. Media Theory, 2(1), 79-107.
  • Genette, Gérard. (1980 [1972]). Narrative Discourse. An Essay in Method. (Translated by Jane E. Lewin). Oxford: Blackwell.
  • Goosseff, Kyrill A. (2014). Only narratives can reflect the experience of objectivity: effective persuasion, Journal of Organizational Change Management, Vol. 27 Iss: 5, pp. 703 – 709
  • Gubrium, Jaber F. & James A. Holstein. (2009). Analyzing Narrative Reality. Thousand Oaks, CA: Sage.
  • Harmon, William (2012), A Handbook to Literature (12th ed.), Boston: Longman, ISBN 978-0-205-02401-8.
  • Holstein, James A. & Jaber F. Gubrium. (2000). The Self We Live By: Narrative Identity in a Postmodern World. New York: Oxford University Press.
  • Holstein, James A. & Jaber F. Gubrium, eds. (2012). Varieties of Narrative Analysis. Thousand Oaks, CA: Sage.
  • Hunter, Kathryn Montgomery (1991). Doctors' Stories: The Narrative Structure of Medical Knowledge. Princeton, NJ: Princeton University Press.
  • Jakobson, Roman. (1921). "On Realism in Art" in Readings in Russian Poetics: Formalist and Structuralist. (Edited by Ladislav Matejka & Krystyna Pomorska). The MIT Press.
  • Labov, William. (1972). Chapter 9: The Transformation of Experience in Narrative Syntax. In: "Language in the Inner City." Philadelphia, PA: University of Pennsylvania Press.
  • Lévi-Strauss, Claude. (1958 [1963]). Anthropologie Structurale/Structural Anthropology. (Translated by Claire Jacobson & Brooke Grundfest Schoepf). New York: Basic Books.
  • Lévi-Strauss, Claude. (1962 [1966]). La Pensée Sauvage/The Savage Mind (Nature of Human Society). London: Weidenfeld & Nicolson.
  • Lévi-Strauss, Claude. Mythologiques I-IV (Translated by John Weightman & Doreen Weightman)
  • Linde, Charlotte (2001). Chapter 26: Narrative in Institutions. In: Deborah Schiffrin, Deborah Tannen & Heidi E. Hamilton (ed.s) "The Handbook of Discourse Analysis." Oxford & Malden, MA: Blackwell Publishing.
  • Norrick, Neal R. (2000). "Conversational Narrative: Storytelling in Everyday Talk." Amsterdam & Philadelphia: John Benjamins Publishing Company.
  • Ranjbar Vahid. (2011). The Narrator, Iran: Baqney
  • Pérez-Sobrino, Paula (2014). "Meaning construction in verbomusical environments: Conceptual disintegration and metonymy". Journal of Pragmatics. Elsevier. 70: 130–151. doi:10.1016/j.pragma.2014.06.008.
  • Quackenbush, S.W. (2005). "Remythologizing culture: Narrativity, justification, and the politics of personalization" (PDF). Journal of Clinical Psychology. 61 (1): 67–80. doi:10.1002/jclp.20091. PMID 15558629.
  • Polanyi, Livia. (1985). "Telling the American Story: A Structural and Cultural Analysis of Conversational Storytelling." Norwood, NJ: Ablex Publishers Corporation.
  • Salmon, Christian. (2010). "Storytelling, bewitching the modern mind." London, Verso.
  • Schmid, W. (2010). Narratology: an introduction. Walter de Gruyter.
  • Shklovsky, Viktor. (1925 [1990]). Theory of Prose. (Translated by Benjamin Sher). Normal, IL: Dalkey Archive Press.
  • Todorov, Tzvetan. (1969). Grammaire du Décameron. The Hague: Mouton.
  • Toolan, Michael (2001). "Narrative: a Critical Linguistic Introduction."
  • Traupman, John C. (1966), The New College Latin & English Dictionary, Toronto: Bantam, ISBN 978-0-553-27619-0.
  • Turner, Mark (1996). "The Literary Mind."
  • Ranjbar Vahid. The Narrator, Iran: Baqney 2011 (summary in english)
  • White, Hayden (2010). The Fiction of Narrative: Essays on History, Literature, and Theory, 1957–2007. Ed. Robert Doran. Baltimore: Johns Hopkins University Press.
  • Webster's New World Dictionary, New York: Warner Books, Inc., 1984, ISBN 0-446-31450-1.
  • Webster's Seventh New Collegiate Dictionary, Springfield: G. & C. Merriam Company, 1969.

攷[編輯]

  1. ↑ "古仔". 現代標準漢語與粵語對照資料庫. 喺2021-05-17搵到.
  2. ↑ Webster's New World Dictionary, New York: Warner Books, Inc., 1984.
  3. ↑ Baldick, Chris (2004), The Concise Oxford Dictionary of Literary Terms, Oxford: Oxford University Press,
  4. ↑ Traupman, John C. (1966), The New College Latin & English Dictionary, Toronto: Bantam.
  5. ↑ Carey, Gary; Snodgrass, Mary Ellen (1999), A Multicultural Dictionary of Literary Terms, Jefferson: McFarland & Company.
  6. ↑ 6.0 6.1 Lunsford, Andrea A.; Horowitz, Franklin E. (2005), The Everyday Writer (3rd ed.), Boston: Bedford/St. Martin's.
  7. ↑ 7.0 7.1 7.2 Maria DiBattista (2011). Novel Characters: A Genealogy. John Wiley & Sons. pp. 14–20.
  8. ↑ Myers, D. G. (2006). The Elephants Teach: Creative Writing since 1880. University of Chicago Press. 1427 East 60th Street, Chicago, IL 60637.
  9. ↑ 9.0 9.1 Harmon, William (2012), A Handbook to Literature (12th ed.), Boston: Longman.
  10. ↑ The Random House Dictionary of the English Language, New York: Random House, 1979.
  11. ↑ Hodge, et al. 2002. Utilizing Traditional Storytelling to Promote Wellness in American Indian events within any given narrative.
  12. ↑ 12.0 12.1 Toolan, M. (2001). Narrative: A Critical Linguistic Introduction. Interface. London: Routledge. p. 2.
  13. ↑ Sternberg, M., 2010. Narrativity: from objectivist to functional paradigm. Poetics Today, 31, 507–659.
  14. ↑ 14.0 14.1 Schmid, W. (2010). Narratology: an introduction. Walter de Gruyter. p. 8 - 12.
  15. ↑ Data tell a story, too 互聯網檔案館嘅歸檔，歸檔日期2019年12月19號，.. Conversant.
  16. ↑ Karimi, Edith (2016). Mimetische Bildung durch Märchen: Phantasie, Narration, Moral [Mimetic education through Märchen: phantasy, narration, morality]. European Studies in Education (in German). 34. Münster: Waxmann Verlag. p. 110. ISBN 9783830984726. Retrieved 2018-10-25. Manche Märchen ordnet [August] Nitschke den Jägern und Hirten der letzten Eiszeit zu, andere den Bauern und Fischern im Mesolithikum, wieder andere den Seefahrern der Meglithgesellschaft oder den Helden der Indogermanen. [August Nitschke assigns many fairy-tales to the hunters and herders of the last Ice Age, other ones to the farmers and fisherfolk of the Mesolithic, and still other ones to the seafarers of the megalith cultures or to the heroes of the Indo-European peoples.]
  17. ↑ International Journal of Education and the Arts | The Power of Storytelling: How Oral Narrative Influences Children's Relationships in Classrooms.
  18. ↑ Hogan, P. Colm (2011). What Literature Teaches Us about Emotion. New York: Cambridge University Press.
  19. ↑ 19.0 19.1 McCloud, Scott (2000). Reinventing Comics: How Tmagination and Technology are Revolutionizing an Art Form (1st Perennial ed.). Perennial.
  20. ↑ Cook, Pam (2007). The Cinema Book, Third Edition. London: British Film Institute.
  21. ↑ Gillette, J. M., & McNamara, M. J. (2008). Designing with light: an introduction to stage lighting. McGraw-Hill.
  22. ↑ Penner, N. (2015). A Philosophy of Operatic Storytelling (Doctoral dissertation, McGill University).
  23. ↑ Homans, J. (2013). Apollo's angels: A history of ballet. Granta Books.
  24. ↑ Fludernik, Monika (2001-08-01). "Narrative Voices--Ephemera or Bodied Beings". New Literary History. 32 (3): 707–710.
  25. ↑ A Case Study in Narrative Design. Gamasutra.
  26. ↑ Steiff, Josef (2005). The Complete Idiot's Guide to Independent Filmmaking. Alpha Books.
  27. ↑ 27.0 27.1 Jose, P. E., & Brewer, W. F. (1984). Development of story liking: Character identification, suspense, and outcome resolution. Developmental Psychology, 20(5), 911.
  28. ↑ What is Conflict in a Story? A Quick Reminder of the Purpose of Conflict.
  29. ↑ Fenske, C. (2008). Muggles, monsters and magicians: A literary analysis of the Harry Potter series (Vol. 2). Peter Lang.
  30. ↑ Rozelle, Ron (2005). Write Great Fiction: Description & Setting. Cincinnati, OH: Writer's Digest Books.
  31. ↑ Mark J.P. Wolf (2014). Building Imaginary Worlds: The Theory and History of Subcreation. Routledge.
  32. ↑ Ansen Dibell, Ph.D. (1999-07-15). Plot. Elements of Fiction Writing. Writer's Digest Books. pp. 5 f. ISBN 978-0-89879-946-0. Plot is built of significant events in a given story – significant because they have important consequences. Taking a shower isn't necessarily plot... Let's call them incidents ... Plot is the things characters do, feel, think or say, that make a difference to what comes afterward.
  33. ↑ 33.0 33.1 Foster-Harris (1960). The Basic Formulas of Fiction. Norman, OK: University of Oklahoma Press.
  34. ↑ 34.0 34.1 Griffith, Kelley (2010), Writing Essays about Literature (8 ed.), Cengage Learning, p. 40.
  35. ↑ 35.0 35.1 EDITORIAL: The art and themes of Mamoru Oshii's 'Ghost In The Shell' 互聯網檔案館嘅歸檔，歸檔日期2017年5月19號，.. Substrean Magazine.
  36. ↑ Shirow, M. (1995). Ghost in the Shell.
  37. ↑ Yuen, W. K. (2000). On the Edge of Spaces:" Blade Runner"," Ghost in the Shell", and Hong Kong's Cityscape. Science Fiction Studies, 1-21.
  38. ↑ How to Create Vivid Imagery in Your Short Story 互聯網檔案館嘅歸檔，歸檔日期2017年10月2號，..
  39. ↑ 39.0 39.1 Hühn, Peter; Sommer, Roy (2012). "Narration in Poetry and Drama". The Living Handbook of Narratology. Interdisciplinary Center for Narratology, University of Hamburg.
  40. ↑ 40.0 40.1 Boris Uspensky, A Poetics of Composition: The Structure of the Artistic Text and Typology of Compositional Form, trans. Valentina Zavarin and Susan Wittig (Berkeley, CA: University of California Press, 1973).
  41. ↑ 41.0 41.1 Susan Sniader Lanser, The Narrative Act: Point of View in Prose Fiction (Princeton, NJ: Princeton University Press. 1981).
  42. ↑ James L. Resseguie, "Point of View," in How John Works: Storytelling in the Fourth Gospel, ed. Douglas Estes and Ruth Sheridan (Atlanta: SBL Press, 2016), 83-5.
  43. ↑ Elnahla, N. The Other Beyond the Wall: A Postcolonial Reading of George RR Martin’s A Song of Ice and Fire and HBO’s Game of Thrones.
  44. ↑ Hartner, Marcus. "Multiperspectivity". The Living Handbook of Narratology. University of Hamburg.
  45. ↑ Caracciolo, P., & Hassenstab, C. (1988). Arabian Nights In English Literature: Studies In The Reception Of The Thousand And One Nights Into. Springer.
  46. ↑ French, Christy Tillery. "Literary Fiction vs Genre Fiction". AuthorsDen.
  47. ↑ 47.0 47.1 "Soft SF," Encyclopedia of Science Fiction, ed. John Clute and Peter Nicholls, 1995,
  48. ↑ 48.0 48.1 48.2 Saricks, J. G. (2001). The readers' advisory guide to genre fiction. American Library Association.
  49. ↑ Luckhurst, R. (2010). Science fiction. The Encyclopedia of Literary and Cultural Theory.
  50. ↑ Asimov, "How Easy to See the Future!", Natural History, 1975.
  51. ↑ Heinlein, Robert A.; Cyril Kornbluth; Alfred Bester; Robert Bloch (1959). The Science Fiction Novel: Imagination and Social Criticism. University of Chicago: Advent Publishers.
  52. ↑ Pierce, J. J. (1993). The literary experience of hard science fiction. Science Fiction Studies, 176-183.
  53. ↑ Richard Matthews (2002). Fantasy: The Liberation of Imagination. Routledge.
  54. ↑ ON FANTASY 互聯網檔案館嘅歸檔，歸檔日期2019年11月12號，.. www.georgerrmartin.com.
  55. ↑ Brian Stableford, The A to Z of Fantasy Literature, (p. 198), Scarecrow Press, Plymouth. 2005.
  56. ↑ Flood, Alison (April 13, 2011). "George RR Martin: Barbarians at the gate". The Guardian.
  57. ↑ Martin Horstkotte, The postmodern fantastic in contemporary British fiction. WVT, Trier, 2004.
  58. ↑ Pierce, J. B. (2004). What's Harry Potter Doing in the Library? Depictions of Young Adult Information Seeking Behaviour in Contemporary Fantasy Fiction. In International Association of School Librarianship. Selected Papers from the... Annual Conference (p. 73). International Association of School Librarianship.
  59. ↑ 59.0 59.1 Neil Barron, Horror Literature: A Reader's Guide. New York: Garland, 1990.
  60. ↑ Horror. Literary Terms.
  61. ↑ Bloom, Clive (2007). Gothic Horror: A Guide for Students and Readers. Basingstoke: Palgrave Macmillan.
  62. ↑ Thacker, Eugene (January 30, 2016). "Black illumination: the unhuman world of Junji Ito". The Japan Times.
  63. ↑ Cruz, R. A. L. (2012). "Mutations and Metamorphoses: Body Horror is Biological Horror". Journal of Popular Film and Television. 40 (4): 160–168.
  64. ↑ Nguyen, Trung (20 December 2016). History of Humans. Is There a God?. 3. EnCognitive. ASIN B01MS00MUT. Cosmicism [is] [t]he literary philosophy…stating that there is no recognizable divine presence, such as God, in the universe, and that humans are particularly insignificant in the larger scheme of intergalactic existence.
  65. ↑ Brewster, Liz (2017-03-01). "Murder by the book: using crime fiction as a bibliotherapeutic resource". Medical Humanities. 43 (1): 62–67.
  66. ↑ Abrams, M.H. (2015). A Glossary of Literary Terms. Cengage Learning. p. 69.
  67. ↑ Franks, Rachel (2011). "May I Suggest Murder?: An Overview of Crime Fiction for Readers' Advisory Services Staff". Australian Library Journal. 60 (2).
  68. ↑ 68.0 68.1 Milda, Danytė (2011). Introduction to the analysis of crime fiction : a user-friendly guide. Vytauto Didžiojo universitetas.
  69. ↑ 12 Forensic Crime Thrillers to Satisfy your Morbid Curiosity.
  70. ↑ Regis, P. (2013). A natural history of the romance novel. University of Pennsylvania Press.
  71. ↑ Fox, Robert C. (September 1962). "Elizabeth Bennet: Prejudice or Vanity?". Nineteenth-Century Fiction. 17 (2): 185–187.
  72. ↑ Gao, Haiyan (February 2013). "Jane Austen's Ideal Man in Pride and Prejudice". Theory and Practice in Language Studies. 3 (2): 384–388.
  73. ↑ Gregory Kirschling (2007-08-02). "Stephenie Meyer's 'Twilight' Zone". Entertainment Weekly.
  74. ↑ All you need to know about Tchaikovsky's Swan Lake 互聯網檔案館嘅歸檔，歸檔日期2019年4月4號，.. Reader's Digest.
  75. ↑ Culler, Jonathan (2000). Literary Theory: A Very Short Introduction. Oxford University Press. p. 31. Non-fictional discourse is usually embedded in a context that tells you how to take it: an instruction manual, a newspaper report, a letter from a charity and so on. The context of fiction, though, explicitly leaves open the question of what the fiction is really about. Reference to the world is not so much a property of literary [i.e. fictional] works as a function they are given by interpretation.
  76. ↑ Poulin, R. (2012). Graphic design and architecture, a 20th century history: a guide to type, image, symbol, and visual storytelling in the modern world. Rockport Pub.
  77. ↑ Humanities tell our stories of what it means to be human 互聯網檔案館嘅歸檔，歸檔日期2019年3月22號，..
  78. ↑ Nash, C. (Ed.). (2005). Narrative in culture: The uses of storytelling in the sciences, philosophy and literature. Routledge.
  79. ↑ 79.0 79.1 Abell. P. (1987) The Syntax of Social Life: the theory and Method of Comparative Narratives, Oxford University Press, Oxford.
  80. ↑ Abell, P. (1993) Some Aspects of Narrative Method, Journal of Mathematical Sociology, 18. 1-25.
  81. ↑ Abell, P. (2009). A Case for Cases, Comparative Narratives in Sociological Explanation, Sociological Methods and Research, 32, 1-33.
  82. ↑ Abell, P. (2011) Singular Mechanisms and Bayesian Narratives in ed. Pierre Demeulenaere, Analytical Sociology and Social Mechanisms. Cambridge University Press, Cambridge.
  83. ↑ Abell, P. (2009) History, Case Studies, Statistics and Causal Inference, European Sociological review, 25, 561–569.
  84. ↑ Mani, I. (2014). Computational narratology. Handbook of narratology, 84-92.
  85. ↑ Gervás, P., León, C., & Méndez, G. (2015). Schemas for narrative generation mined from existing descriptions of plot. In 6th Workshop on Computational Models of Narrative (CMN 2015). Schloss Dagstuhl-Leibniz-Zentrum fuer Informatik.
  86. ↑ "Native storytellers connect the past and the future : Native Daughters 互聯網檔案館嘅歸檔，歸檔日期2017年11月15號，.".
  87. ↑ Iseke, J., & Brennus, B. (2011). Learning life lessons from Indigenous storytelling with Tom McCallum (pp. 245–261). Indigenous Philosophies and Critical Education. New York: Peter Lang.
  88. ↑ Eder, D. J. (2007). Bringing Navajo storytelling practices into schools: The importance of maintaining cultural integrity. Anthropology & Education Quarterly, 38(3), 278-296.
  89. ↑ Piquemal, N. (2003). From Native North American oral traditions to Western literacy: Storytelling in education. Alberta Journal of Educational Research, 49(2).
  90. ↑ Basso, 1984. "Stalking with Stories". Names, Places, and Moral Narratives Among the Western Apache.
  91. ↑ 91.0 91.1 Hodge, F., Pasqua, A., Marquez, C., & Geishirt-Cantrell, B. (2002). Utilizing Traditional Storytelling to Promote Wellness in American Indian Communities. Journal of Transcultural Nursing, 6-11.
  92. ↑ MacDonald, M., McDowell, J., Dégh, L., & Toelken, B. (1999). Traditional storytelling today: An international sourcebook. Chicago: Fitzroy Dearborn
  93. ↑ Barr, P., Noble, J., Biddle, R., & Khaled, R. (2006, January). From pushing buttons to play and progress: Value and interaction in Fable. In Proceedings of the 7th Australasian User interface conference-Volume 50 (pp. 61-68). Australian Computer Society, Inc..
  94. ↑ Flower, L. S., & Hayes, J. R. (1977). Problem-solving strategies and the writing process. College English, 39(4), 449-461.
  95. ↑ Donald M. Murray, "Teach Writing as a Process Not Product" The Leaflet (November 1972), rpt. in Cross-Talk in Comp Theory, 2nd ed., ed. Victor Villanueva, Urbana: NCTE, 2003.
  96. ↑ Pattison, Darcy. Paper Lightning:Prewriting Activities to Spark Creativity. Cottonwood Press, 2008.
  97. ↑ The Writing Process: Step One. Writer's Digest.
  98. ↑ Hatcher (2000). The Art and Craft of Playwriting. F+W Media. p. 43.
  99. ↑ Atlee, Nancy (1998). Beginning Writing Lab. San Luis, CA: Prufrock Press Inc. p. 44.

拎[編輯]

由「https://zh-yue.wikipedia.org/w/index.php?title=故仔&oldid=1701298」收