Lengoistega
ZE
|
Quésta pàgina a l'é scrîta in léngoa zenéize
 A Grafîa adeuviâ a l'é quélla de l'Académia Ligùstica do Brénno |
A lengoìstica a l'è o stùdio scentìfico di lengoàggi[1]. A conprénde l'anàlixi de ògni caraterìstica do lengoàggio, inclûzi i métodi dêuviæ inti sò stùddi e pi-â sò modelaçión.
E àree tradiçionâli de l'anàlixi lengoìstica sòn fonética, fonologîa, morfologîa, scintàsci, semantìca e pragmatìca[2]. Ciaschedùnn-a de 'ste àree chi a se òcupa ciù ò mêno de 'n di fenòmeni che se pêuan riscontrâ inti scistêma lengoìstichi umâni: i soîn (e i gèsti, into câxo de léngoe di ségni), unitæ mìnime (paròlle, morfêmi), frâzi, scignificâti e ûzo. A lengoìstica dónca a studia quésti fenòmeni in mòddi divèrsci e sòtta vàrie prospetîve.
A lengoìstica teòrica, ch'a inclùdde a tradiçionâle lengoìstica descritîva, a se òcupa de costroî i modélli de quésti scistêmi, de sò pàrte (ontologîe) e da sò conbinatoîa. A psicolengoìstica a costroìsce e teorîe in sce l'elaboraçión e a produçión de tùtti 'sti fenòmeni chi. Quésti fenòmeni pêuan êse studiæ in mòddo sincronìco ò diacronìco (atravèrso a stöia), in monolìngoe e poliglòtti, in figeu ò grànde, cómme eleménti òtegnûi òpû statisticaménte, còmme ògètti astræti ò cómme strutûe cognitîve interiorizæ, dêuviàndo tèsti (corpora) ò con l'elicitaçión sperimentâle, arecheuggéndo dæti mecanicaménte, co-o travàggio in sciô cànpo, ò con métodi de giudìçio introspetîvo. A lengoìstica conputaçionâle a l'inplementa di costrûti teòrichi pe analizâ ò prodûe 'n lengoàggio naturâle ò òmòloghi. A neorolengoìstica a studia i fenòmeni lengoìstichi atravèrso di esperiménti in scê rispòste neorâli da çervélla a di stìmoli lengoìstichi.
A lengoìstica a l'è streitaménte ligâ a âtre disciplìnn-e cómme a filozofîa do lengoàggio, a stilistìca e a retòrica, a semiotìca, a lescicografîa e a traduçión.
Ràmmi da lengoìstica[modìfica | modìfica wikitèsto]
Variêtæ lengoìstiche[modìfica | modìfica wikitèsto]
I lengoàggi coêxìstan co-în ànpio continuum de convençionalizaçión, ch'o pòrta a de divixoîn sfocæ tra concètti cómme quélli de dialétti e de léngoe. E léngoe pêuan subî di cangiaménti intèrni i quæ portan a-o svilùppo de sotovariêtæ cómme regìstri lengoìstichi, acénti e dialétti. Scimilménte, e léngoe pêuan subî di cangiaménti aprêuvo a-o contàtto con parlànti de âtre léngoe, con nêuve variêtæ de léngoe che pêuan nàsce da quéste scitoaçioîn de contàtto atravèrso o procèsso de génezi do lengoàggio.
Variêtæ de contàtto[modìfica | modìfica wikitèsto]
E variêtæ de contàtto cómme i pidgin e i créoli són de variêtæ lengoìstiche che de spésso se són creæ in de scitoaçioîn de contàtto prolongòu tra de comunitæ che parlan de léngoe diferénti. I pidgin són de variêtæ lengoìstiche da-a convençionalizaçión limitâ e inti quæ a comunicaçión a l'è trasmìssa atravèrso de gramàtiche senplificæ che pêuan vegnî co-o ténpo ciù articolæ, co-a continoaçión do contàtto lengoìstico. E léngoe créole són de variêtæ lengoìstiche scìmili a-i pidgin ma che àn 'na mêgio convençionalizaçión e stabilitæ. De manimàn che e nêuve generaçioîn crescan in de scitoaçioîn de contàtto, o l'è poscìbile che inpréndan 'n pidgin locâle cómme léngoa moæ. Atravèrso quésto procèsso de acquixiçión e trasmisción, nêuve caraterìstiche gramaticâli e eleménti lescicâli vêgnan creæ pe colmâ i gàrbi lengoìstichi, trasformàndo coscì o pidgin inte 'n lengoàggio conplêto.
Però, no tùtte e scitoaçioîn de contàtto lengoìstico àn portòu a-o svilùppo de 'n pidgin ò créolo, fæto ch'o l'à portòu i riçercatoî a studiâ e caraterìstiche de scitoaçioîn de contàtto che favorìscan o svilùppo de quésti tîpi de variêtæ. De spésso quéste variêtæ se són svilupæ a partî da de scitoaçioîn de colonizaçión e sfrutaménto, inte quæ i squilìbri de potêre evitan a-i grùppi de contàtto de inprénde a léngoa de l'âtro, ma a ògni mòddo o suscìste 'n contàtto ch’o dûa pe 'n çérto ténpo. A léngoa sogiogâ inte relaçioîn de potêre a l'è a léngoa de substratum, méntre quélla dominànte a l'è o superstratum. De spésso e paròlle e o léscico de 'na variêtæ de contàtto vêgna da-o superstratum, ch'o diventa coscì o lescificatô, méntre e strutûe gramaticâli vêgnan da-o substratum, scibén che gh'è vàrie eceçioîn[3].
Dialétti[modìfica | modìfica wikitèsto]
In dialétto a l'è 'na variêtæ de lengoàggio ch'a l'è caraterìstica de 'n particolâ grùppo tra-i parlànti de 'na léngoa[4]. E persónn-e into grùppo ch'o l'arechéugge i parlànti de 'n dialétto són de sòlito ligæ l'unn-a e l'âtra da 'n'identitæ sociâle comùn. Quésto fæto o l'è a diferénsa prinçipâ tra 'n dialétto e 'n regìstro ò 'n discórso, dæto che inte 'sti doî câxi chi l'identitæ colturâle a no l'à 'n ròllo inportànte. I dialétti són de variêtæ lengoìstiche che àn de pròpie régole gramaticâli e fonologìche, caraterìstiche lengoìstiche e stilìstiche, ma no l'àn riçevûo o status ofiçiâ de léngoe; riconosciménto che de spésso o l'è ligòu ciù a de raxoîn polìtiche e sociâli ciufîto che lengoìstiche. Âtre vòtte i dialétti rèstan emarginæ, in particolâ quànde són asociæ a di grùppi sociâli emarginæ ànche lô[5]. A diferenzaçión tra-i dialetti e, de consegoénsa, de léngoe ascì, a l'è bazâ in sce l'ûzo de régole gramaticâli, régole scintàtiche e caraterìstiche stilìstiche, de vòtte sénsa fâ riferiménto a l'ûzo lescicâle ò a-o vocabolâio. Scitoaçión ch'a l'è bén bén riasónta into mòddo de dî "'na léngoa a l'è 'n dialétto co-în ezèrcito e 'na marìnn-a", atriboîo a-o lengoìsta Max Weinreich.
| (EN)
«We may as individuals be rather fond of our own dialect. This should not make us think, though, that it is actually any better than any other dialect. Dialects are not good or bad, nice or nasty, right or wrong - they are just different from one another, and it is the mark of a civilised society that it tolerates different dialects just as it tolerates different races, religions and sexes» |
(LIJ)
«Niâtri poémmo, cómme sénci indivìdoi, êse asæ afeçionæ a-o nòstro dialétto. Quésto o no dêve però fâne pensâ che o nòstro o l'è mêgio de ògni âtro dialétto. I dialétti no són bón ò catîvi, bèlli ò brùtti, giùsti ò eræ - són sôlo divèrsci l'un da l'âtro, e o l'è ségno de 'na socjêtæ civilizâ o fæto che quésta a tòlera i vàrri dialétti coscì cómme quànde quésta a rispètta e divèrse ràsse, religioîn e sèssi.» |
| (Peter Trudgill, Dialects[6]) |
Léngoa stàndard[modìfica | modìfica wikitèsto]
Quànde 'n dialétto o l'è abàsta docomentòu atravèrso a descriçión lengoìstica da sò gramàtica, ch'a l'è emèrsa pe mêzo de lézze consensoâli a l'intèrno da sò comunitæ, a l'òtegnî o riconosciménto polìtico e naçionâle atravèrso e polìtiche adotæ da 'n pàize ò 'na región. Quésto o l'è o stàdio into quæ 'n lengoàggio o l'è conscideròu 'na variêtæ stàndard, ò sæ unn-a e quæ lézze gramaticâli se són òua stabilizæ a partî da-o consénso di parteçipànti a 'na comunitæ lengoìstica, dòppo 'na suficénte evoluçión, inprovizaçión, coreçión e créscita. A léngoa ingléize, coscì cómme, fòscia, quélla françéize ascì, pêuan êse di ezénpi de léngoe che són arivæ progresivaménte a 'n stàdio into quæ o se dî che séggian diventæ de variêtæ stàndard.
Relativitæ[modìfica | modìfica wikitèsto]
Cómme ricostroîo da-a popolâre ipòtexi de Sapir-Whorf (ò ipòtexi da relativitæ lengoìstica), i relativìsti créddan che a strutûa de 'na çérta léngoa a l'è in gràddo de infloensâ i modélli cognitîvi atravèrso i quæ 'na persónn-a a fórma a pròpia vixón do móndo. I universalìsti créddan che gh'è di pónti in comùn tra-a perceçión umâna dónde a gh'è a capaçitæ de lengoàggio, méntre i relativìsti creddàn che quésta a càngia da léngoa a léngoa, e adreitûa da persónn-a a persónn-a. Méntre l'ipòtexi de Spir-Whorf a l'è 'n'elaboraçión de 'sta idêa chi, segóndo quànte esprèsso inte publicaçioîn di lengoìsti americhén Edward Sapir e Benjamin Lee Whorf, o sò nómme o l'è stæto decîzo da l'aliêvo de Sapir, Harry Hoijer. Ànche o lengoìsta tedésco do XIX sécolo Leo Weisgerber o l'à scrîto vàrie publicaçioîn in sciô têma da teorîa da relativitæ lengoìstica. I relativìsti supòrtan o câxo da diferenzaçión a-o livéllo da cogniçión e inti domìni semàntichi. L'emèrge da lengoìstica cognitîva inti ànni '80 o l'à ravivòu l'interèsse inta relativitæ lengoìstica ascì. Pensatoî cómme George Lakoff àn sostegnûo che o lengoàggio o riflètte e diferénti metàfore colturâli méntre i scrîti do filòzofo do lengoàggio françéize Jacques Derrida, spécce quélli in sciâ decostruçión[7], són stæti vìsti cómme streitaménte asociæ a-o moviménto relativìsta inta lengoìstica, raxón pi-â quæ són stæti forteménte criticæ dòppo a sò mòrte[8].
Strutûe[modìfica | modìfica wikitèsto]
E strutûe lengoìstiche són de cóbie de scignificâto e fórma. Ògni particolâ abinaménto de scignificâto e fórma o l'è 'n coscì dîto ségno de Saussure. Prezénpio o scignificâto da paròlla "gàtto" o l'è raprezentòu inte tùtto o móndo da 'na grànde variêtæ de modélli sonöri (inti lengoàggi òrâli), moviménti de mén e da fàccia (inti lengoàggi di ségni) e scìnboli scrîti (inti lengoàggi scrîti). I modélli lengoìstichi àn dimostròu a pròpia inportànsa into cànpo de l'ingegnerîa da conoscénsa, spécce co-a quantitæ de dæti disponìbile che a-a giornâ d'ancheu a l'è asæ ciù grànde.
I lengoìsti che se concentran in sciâ strutûa tentan de conprénde e régole relatîve a l'ûzo de 'na léngoa che són conosciûe da quélli de léngoa moæ, ànche se no tùtte e vòtte in mòddo coscénte. Tùtte e strutûe lengoìstiche pêuan êse sconpòste in di conponénti mìnimi che vêgnan conbinæ segóndo de régole da-o subcònscio, in sce ciù livélli de anàlixi. Pe fâ 'n ezénpio o se pêu pigiâ a paròlla ingléize pe dî dêximo, ò sæ "tenth" in sce doî divèrsci livélli de anàlixi. A-o livéllo da strutûa intèrna da paròlla, ò sæ da morfologîa, a paròlla "tenth" a l'è conpòsta da 'na fórma lengoìstica ch'a l'indica 'n nùmero e 'n'âtra ch'a l'indica l'òrdinalitæ. A régola ch'a decìdde a conbinaçión de 'ste dôe fórme chi a l'aseghîa che l'indicatô de l'òrdinalitæ "th" o segoe o nùmero "ten", dêxe. A-o livéllo da strutûa do són, ò sæ da fonologîa, l'anàlixi struturâle a fa védde cómme o són da "n" in "tenth" o l'è despægio da quéllo ch'o l'à in "ten". Scibén che a ciù pàrte di parlànti ingléizi a l'è a conoscénsa de régole che govèrnan a strutûa intèrna di doî tòcchi da paròlla "tenth", ciù de ræo conoscian a régola ch'a govèrna a sò strutûa de són. I lengoìsti che fan di stùddi focalizæ prinçipalménte in sciâ strutûa trêuvan e anàlizan e régole cómme quéste, che govèrnan o mòddo into quæ quélli de léngoa moæ l'adêuvian a pròpia léngoa.
Gramàtica[modìfica | modìfica wikitèsto]
A gramàtica a l'è 'n scistêma de régole che govèrnan a produçión e l'ûzo di enunciæ inte 'na çérta léngoa. 'Ste régole chi se aplican ségge a-i soîn[9] che a-i scignificâti e inclùddan di sotogrùppi di conponénti de régole, cómme quélle relatîve a-a fonologîa (l'òrganizaçión di scistêmi sonöri fonètichi), a-a morfologîa (a formaçión e a conpoxiçión de paròlle) e a-a scintàsci (a formaçión e a conpoxiçión de frâzi e di perîodi)[10]. I modèrni scistêmi pe l'anàlixi di prinçìppi da gramàtica inclùddan a lengoìstica struturâle e fonçionâle e a gramàtica generatîva[11].
Àree de stùdio rigoàrdo a l'anàlixi da gramàtica de 'n lengoàggio són:
- Fonètica: a l'è o stùdio de propiêtæ fìxiche da produçión e da perceçión do són da vôxe, aprofondéndo e sò propiêtæ acùstiche e articolatöie.
- Fonologîa: a l'è o stùdio di soîn cómme eleménti astræti inta ménte de l'interlocutô che distìngoan i scignificâti (fonêmi).
- Morfologîa: a l'è o stùdio di morfêmi, ò sæ de strûtue intèrne da paròlla e de cómme pêuan êse modificæ.
- Scintàsci: a l'è o stùdio di mòddi de conbinaçión de paròlle a formâ de frâzi e di perîodi gramaticâli.
- Semantìca: a l'è o stùdio di eleménti gramaticâli e lescicâli do scignificâto[12].
- Pragmatìca: a l'è o stùdio de cómme i enunciæ són dêuviæ inti àtti lengoìstichi e do ròllo ricovèrto da-o contèsto anbientâle e da conoscénsa no lengoìstica inta trasmisción do scignificâto[12].
- Anàlixi do discórso: a l'è o stùdio do lengoàggio dêuviòu inti tèsti (òrâli, scrîti ò gestoâli).
- Stilistìca: a l'è o stùdio di fatoî lengoìstichi (retòrica, diçión e evidensaçión) che méttan 'n discórso into sò contèsto.
- Semiotìca: a l'è o stùdio di ségni e di sò procèssi (semiôxi), indicaçioîn, dezignaçioîn, somegiànse, analogîe, metàfore, scinbolìsmi, scignificâti e comunicaçioîn.
Discórso[modìfica | modìfica wikitèsto]
O discórso o l'è o lengoàggio intéizo cómme pràtica sociâle[13] e o l'è 'n concètto articolòu in sce ciù livélli. Cómme pràtica sociâle, o discórso o l'incàrna vàrie ideologîe atravèrso i tèsti scrîti e parlæ. L'anàlixi do discórso a pêu defæti ezaminâ ò espónn-e quéste ideologîe. O discórso o l'infloénsa o génere, o quæ o vêgne çernûo in rispòsta a-e diferénti scitoaçioîn e a-a fìn, a livéllo mìcro, o discórso o l'infloénsa o lengoàggio intéizo cómme tèsto (parlòu o scrîto) a livéllo fonologìco ò léscico-gramaticâle. Gramàtica e discórso són colegæ fra de lô cómme pàrte de 'n scistêma[14]. 'N çérto discórso o diventa 'na variêtæ lengoìstica quànde o l'è dêuviòu inte quésto mòddo pe 'na raxón particolâ, e o saiâ dónca ciamòu regìstro[15]. Pêuan êse prezénti ànche de azónte lescicâli, de nêuve paròlle, che l'incomensan a êse dêuviæ atravèrso l'esperiénsa da comunitæ de persónn-e che àn 'n çérto ànbito de specializaçión. I regìstri e i discórsi se diferençian dónca pe l'ûzo do vocabolâio e, de vòtte, pe quéllo do stîle ascì. Prezénpio, e persónn-e che travàggian inta mêxìnn-a pêuan dêuviâ inte sò comunicaçioîn da terminologîa da mêghi, pàrte do coscì dîto "discórso mêgo".
Léscico[modìfica | modìfica wikitèsto]
O léscico o l'è 'n catàlogo de paròlle e tèrmini conosciûi da 'n parlànte. O l'è formòu da-e paròlle e da-i morfêmi lighæ, i quæ són de pàrte de paròlle che no pêuan stâ da sôle, cómme i afìsci. In çérte anàlixi són conscideræ pàrte do léscico ànche e paròlle conpòste, çérte clàsse de esprescioîn tìpiche e âtre colocaçioîn. I diçionâi raprezentan di tentatîvi de elencâ, in órdine arfabético, o léscico de 'na çérta léngoa; de sòlito, a ògni mòddo, i morfêmi lighæ no són chi inclûzi. A lescicografîa, streitaménte ligâ a-o domìnio da semantìca, a l'è a scénsa da mapatûa de paròlle inte 'n'enciclopedîa ò 'n diçionâio. A creaçión e l'azónta de nêuve paròlle into léscico a l'è ciamâ coniaçión ò neologizaçión[16], co-e nêuve paròlle che són ciamæ neologìsmi.
A l'è 'na credénsa difûza quélla de consciderâ che a capaçitæ d'esprìmise de 'n parlànte de 'na çérta léngoa a sta inta quantitæ de paròlle prezénti into sò léscico méntre, in realtæ, quésta supoxiçión pe-i lengoìsti a l'è fâsa. Segóndo vàrri studiôzi, a capaçitæ de dêuvia 'na léngoa a sta sorviatùtto inta conoscénsa da gramàtica, colegâ dónca a-a conpeténsa lengoìstica ciufîto che a-a créscita do vocabolâio. Ànche 'n léscico asæ picìn o l'è defæti in gràddo de prodûe 'n nùmero infinîo de frâze.
Stîle[modìfica | modìfica wikitèsto]
A stilistìca a l'inclùdde ànche o stùdio do discórso scrîto, firmòu ò parlòu da divèrse comunitæ lengoìstiche, géneri e formâti editoriâli ò naratîvi inti mézzi de comunicaçión de màssa[17]. Quésto o l'inplica o stùdio e l'interpretaçión di tèsti pe analizâ e caraterìstiche stilistìche do lengoàggio e do tón. L'anàlixi stilistìca a conporta l'anàlixi da descriçión de particolæ dialétti e regìstri dêuviæ da-e comunitæ lengoìstiche. E caraterìstiche stilistìche inclùddan retòrica[18], diçión, acénti, sàtira, ironîa, diàlogo e âtre fórme de variaçioîn fonètiche. L'anàlixi stilistìca a pêu inclùdde ànche o stùdio do lengoàggio inte òpere canòniche de letiatûa, naratîva popolâre, notìçie, publicitæ e âtre fórme de comunicaçión inta coltûa popolâre ascì. De sòlito o l'è vìsto cómme 'na variaçión inta comunicaçión ch'a càngia da parlànte a parlànte e da comunitæ a comunitæ. In brêve, a stilistìca a l'è l'interpretaçión do tèsto.
Inti ànni '60 o Jacques Derrida, prezénpio, o distìngoe ànche tra paròlla e scrîtûa, proponéndo che a léngoa scrîta a ségge studiâ cómme mézzo de comunicaçión lengoìstica in lê[19]. A paleografîa a l'è dónca a disciplìnn-a ch'a stùdia l'evoluçión de fórme scrîte do lengoàggio, cómme ségni e scìnboli[20]. O stùdio formâle do lengoàggio o l'à portòu ànche a-a créscita de çérti cànpi cómme a psicolengoìstica, ch'a l'esplóra a raprezentaçión e a fonçión do lengoàggio inta ménte; a neurolengoìstica, ch'a stùdia l'elaboraçión do lengoàggio into çervello; a biolengoìstica, ch'a stùdia a biologîa e l'evoluçión do lengoàggio; e l'acquixiçión do lengoàggio, ch'a stùdia cómme i banbìn e i ciù gréndi inpréndan a conoscénsa de 'na o ciù léngoe.
Procêde[modìfica | modìfica wikitèsto]
Metodologîa[modìfica | modìfica wikitèsto]
Stöia[modìfica | modìfica wikitèsto]
Àree de riçèrca[modìfica | modìfica wikitèsto]
Nòtte[modìfica | modìfica wikitèsto]
- ↑ (EN) Michael Halliday, On Language and Linguistics, A&C Black, 2006, p. VII, ISBN 0-826-48824-2.
- ↑ (EN) Adrian Akmajian, Ann K. Farmer, Lee Bickmore, Richard A. Demers e Robert M. Harnish, Linguistics: An Introduction to Language and Communication, 7ª ed., MIT Press, 2017, ISBN 0-262-53326-X.
- ↑ (EN) Rachel Selbach, The superstrate is not always the lexifier: Lingua Franca in the Barbary Coast 1530 - 1830, in Susanne Michaelis, Roots of creole structures: Weighing the contribution of substrates and superstrates, Creole Language Library, vol. 33, John Benjamins Publishing, 2008, ISBN 90-27-28996-4.
- ↑ (EN) Help - OED, in sce public.oed.com. URL consultòu o 7 òtôbre 2021.
- ↑ (EN) Rosina Lippi-Green, English with an Accent: Language, Ideology, and Discrimination in the United States, Psychology Press, 1997, ISBN 0-415-11476-4.
- ↑ (EN) Peter Trudgill, Dialects, 2ª ed., Florence (KY), Routledge, 2012, ISBN 1-134-29235-X.
- ↑ (EN) Jacques Derrida, Writing and difference, Chicago, University of Chicago Press, 1978.
- ↑ (EN) Richard Lea, Relative thinking, in sce theguardian.com, 18 novénbre 2014. URL consultòu o 7 òtôbre 2021.
- ↑ Tùtte e nòtte inte 'sto artìcolo chi in sciô stùdio di soîn pêuan riferîse ségge a-i ségni fæti co-e màn che no dêuviæ inte léngoe di ségni.
- ↑ (EN) Adrian Akmajian, Ann K. Farmer, Lee Bickmore, Richard A. Demers, Robert M. Harnish, Linguistics: An Introduction to Language and Communication, 7ª ed., MIT Press, 2017, ISBN 0-262-53326-X.
- ↑ (EN) Andrew Carnie, Syntax: A Generative Introduction, 4ª ed., John Wiley & Sons, 2021, ISBN 1-119-56923-0.
- ↑ 12,0 12,1 (EN) Gennaro Chierchia e Sally McConnell-Ginet, Meaning and Grammar: An Introduction to Semantics, 2ª ed., MIT Press, 2000, ISBN 0-262-53164-X.
- ↑ (EN) Mike Baynham, Literacy practices: Investigating literacy in social contexts, Lóndra, Longman, 1995.
- ↑ (EN) Mira Ariel, Discourse, grammar, discourse (abstract), in Discourse Studies, vol. 11, n. 1, frevâ 2009, pp. 5-36.
- ↑ (EN) Helen Leckie-Tarry, Language and Context, A&C Black, 1995, p. 6, ISBN 0-567-56057-0.
- ↑ (EN) Ghil'ad Zuckermann, Language Contact and Lexical Enrichment in Israeli Hebrew, Springer, 2003, ISBN 1-403-93869-5.
- ↑ (EN) Joybrato Mukherjee, Stylistics (PDF), in sce uni-giessen.de. URL consultòu o 16 òtôbre 2021 (archiviòu da l'url òriginâle o 4 òtôbre 2013).
- ↑ (EN) Ivor Armstrong Richards, The Philosophy of Rhetoric, Oxford University Press, 1936.
- ↑ (EN) Jacques Derrida, Writing and Difference, University of Chicago Press, 2021, ISBN 0-226-81607-9.
- ↑ (EN) Elmer H. Antonsen, Runes and Germanic Linguistics, Walter de Gruyter, 2011, ISBN 3-110-88552-2.
Vôxe corelæ[modìfica | modìfica wikitèsto]
Âtri progètti[modìfica | modìfica wikitèsto]
Wikimedia Commons a contêgne di inmàgine ò di âtri files in sce Lengoistega
Colegaménti estèrni[modìfica | modìfica wikitèsto]
- (EN) Linguistics, in sce britannica.com. URL consultòu o 18 agòsto 2021.
| Contròllo de outoritæ | LCCN (EN) sh85077222 · GND (DE) 4074250-7 · BNF (FR) cb11932194d (data) · BNE (ES) XX525047 (data) · NDL (EN, JA) 00562334 |
|---|