投資

一個熒光幕顯示啲股票嘅價格－買賣股票係一種常見嘅投資。

美國康湼狄格州一間屋－買賣不動產都係投資嘅一種形式。

投資（粵拼：tau⁴ zi¹；英文：investment，動詞係「to invest」）喺經濟學上係指一個個體或者群體短期內消耗資源（投入資源）換取一啲資產，並且諗住靠呢啲資產嚟長遠噉得到更大嘅利益。舉個簡單例子，投資者（investor）喺金融市場使錢（消耗錢呢樣資源）買股票，而佢預咗呢啲資產遲吓會升值－所以第時佢就可以賣手上嘅股票嚟得到利潤。再廣義啲講，投資可以包埋教育等嘅活動，例如一個人短期內消耗時間同錢讀一啲學位，預期讀咗個學位會喺第時提高自己賺錢嘅能力。

喺經濟學同金融學等嘅領域上，有好多研究者都想分辨投資同投機（speculation）兩個概念：佢哋指，有好多人做「買資產，預咗打後會得益」呢樣嘢嗰陣，冇詳細嘅計劃，對自己做緊嘅投資一無所知亂咁買，好多時搞到自己最後損手爛腳，而呢啲經濟學同金融學工作者就主張，呢啲噉嘅行為應該屬「投機」；投機嘅簡單例子有「未清楚理解一間公司就買佢哋股票，淨係諗住齋靠股價嘅短期上落嚟快速獲利」。

投資策略（investment strategy）係金融學上好受重視嘅一個課題：一個投資者揀邊啲資產嚟買、「幾時買」同「幾時賣」等嘅因素都可以影響佢嘅最後所得；投資策略就係泛指一個投資者對於「自己要點做投資」嘅策略，涉及好多對「投資呢家嘢應該按乜嘢法則做，利潤先至會高」嘅思考。喺廿一世紀初，因為投資策略嘅專業性，有好多人玩投資嗰陣都會特登出錢請專家（可以睇吓獨立理財顧問）嚟幫手度投資策略。

概論

而家個人手上得到啲錢，佢應該即刻使咗佢，定係將啲錢投放落去「令自己將來有多啲錢使」嘅嘢嗰度呢？

定義

喺經濟學上，投資嘅嚴格定義係指「消耗資源嚟換取一啲資產，而嗰個個體噉做嘅目的係想等自己第時多啲錢使」：一個個體進行生產活動會得到資源，而佢可以用呢啲資源做消費（consumption）－即係消耗呢啲資源嚟即時性噉滿足自己嘅需要同慾望，又可以用啲資源做投資－消耗啲資源嚟長遠自己嘅利益；舉個簡單例子說明，一個人做嘢賺到錢（得到資源），佢可以

• 將啲錢使嚟買一啲即時滿足到自己需要同慾望嘅嘢，好似係買餸嚟滿足自己「要食嘢」嘅需要，即係消耗資源得到「餸」呢樣能夠即時噉有價值嘅嘢－消費；
• 另一方面，佢又可以將啲錢使嚟買貨（假設佢有充分理由信呢啲貨會升值）再喺一段時間之後，靠賣走啲貨嚟賺利潤，即係消耗資源得到啲會喺一段時間後提升自己利益嘅資產－投資。

順帶一提，有關消費同投資之間嘅對比，可以睇吓延遲折扣（delay discounting）嘅概念。

概念比較

有好多經濟學同金融學等領域嘅研究者都主張，投資有別於投機（speculation）同賭錢（gambling），主要在於幾點：

• 持有時期：投資者會攞住為投資買嘅資產攞一段相對長嘅時間，投機者會攞住啲資產攞一段短時間，而賭錢嘅人近乎唔會買啲乜嘢資產；
• 分析程度：投資者會為咗做投資做好多詳細嘅分析，投機者靠嘅頂櫳係小道消息，而賭錢靠嘅係運氣；
• 結果出現嘅時間：投資回報需要一段有返咁上下長嘅時間先會浮現，而投機同賭錢嘅時期短。

例如有好多人喺買股票嗰陣都會噉樣做：佢哋冇清楚理解一間公司嘅情況，唔知間公司响業務上前景好唔好，所以冇充分理由真係信間公司嘅股票會升值，淨係諗住齋靠股票市場實會有嘅週期性上上落落嚟獲利。而有好多研究者都認為，呢種行為喺概念上理應係有別於投資嘅－於是就將呢啲活動定性為「投機」。

投資形式

一位投資者喺度用幾個熒幕睇住自己買咗嗰幾隻股票嘅勢。

投資可以有好多種形式。廿一世紀初比較常見嘅投資形式有以下呢啲：

金融工具

• 股票（stock）：指一間上市公司嘅擁有權嘅一部份；如果一個人買咗間公司嘅股票（即係「持有若干量嘅股份」），噉佢就係間公司嘅股東，算得上係間公司嘅擁有者之一，會（視乎佢持有幾多股份）喺間公司嘅營運上或多或少噉有啲話事權；噉亦都表示，如果嗰間公司喺業務上得到成功，啲股東就有權分利潤，而一個股東分到嘅利潤嘅量通常係佢持有愈多股份就會愈多嘅；一個人會買一間公司嘅股份通常都係因為佢睇好間公司嘅前景，而由間公司嘅角度睇，賣股票可以幫自己籌集擴張業務（睇埋商業發展）必要嘅資金。
• 債券（bond）：基本上係債券持有者借錢俾一間公司嘅途徑；買咗債券嘅人唔算係擁有間公司，唔會喺間公司嘅營運上有乜嘢話事權，但佢哋手上攞住啲債券，就表示間公司差咗佢哋錢，所以間公司就需要定時定候還啲錢（而且仲有利息）；原理上，債券同股票好相似，都係一間公司想要籌集擴張業務要用嘅資金賣嘅，而如果啲投資者睇好間公司，覺得間公司係會愈碌愈大令到自己賺到錢嘅，就會肯使錢買債券同股票。
• 金融衍生工具（financial derivatives）：金融衍生工具係金融工具一種，特徵係價值建基於第種金融工具嘅價值之上；有以下呢啲種類：
  • 期貨（futures contract）：係一種協議，喺做個協議之前，買賣雙方講好個價，並且同意响第時嘅某個時間點會買或者賣某樣嘢（可以係股票或者債券等嘅金融工具，即係話件期貨嘅價值建基於交易緊嘅股票或者債券嘅價值）；例如家陣 A 同 B 兩位投資者同意，一個月後 A 會用 $x$ 咁多嘅錢買起 B 手上嘅 $X$ 公司嘅股份，如果 $X$ 公司嘅股價喺呢一個月之內升嘅話，A 就會著數咗－等同可以用低啲嘅價錢買入啲股份。
  • 期權（option）：都係一種協議，買賣雙方講好個履約價（strike price）同埋一個日期，而其中一方有權喺嗰個日期打前用履約價買或者賣件某樣事件講好咗嘅嘢（同一道理，呢樣嘢可以係股票或者債券，而噉亦都表示，期權嘅價值建基於交易緊嘅股票或者債券嘅價值）；期權協定嘅係其中一方「有權」買或者賣－相對於期貨嘅「一定要」買或者賣。
• 保險（insurance）：例如人壽保險（life insurance）都可以算係投資；一個人買咗人壽保就表示，佢要俾一定量嘅錢（短期內有代價），而喺佢死咗之後，佢嘅保險受益人（通常係佢屋企人）會攞到一筆有返咁上下大嘅錢（長遠嘅大嚿利益）；買人壽保都有一定嘅學問－例如家陣買咗一份人壽保，但如果喺買至攞到錢期間有極大嘅通脹嘅話，份人壽保嘅實際價值（real value）可以話係跌咗。

... 等等。

實質資產

兩碌金條；買貴金屬可以保值，係一種頗受歡迎嘅投資方法。

• 不動產（real property）：不動產泛指地以及地上面嘅結構（例如係屋）；買賣不動產係一種常見嘅投資－想像家陣一個人俾錢買咗間屋（短期付出資源），而間屋或者笪地嘅價錢喺一段時間後升咗，噉到時佢將間屋賣俾人就有賺，而買同賣嗰段期間，佢又可以透過俾人租間屋住嚟賺錢（長遠得到多啲嘅資源）；同股票等嘅金融工具比起嚟，不動產嘅流通性（liquidity）低啲，即係話買嘅過程同賣嘅過程都比較嘥時間，唔係話賣就賣得到，而且不動產往往仲要求持有人使錢嚟維持－屋等嘅建築物要維修，唔維修嘅話間屋就會開始爛，間屋爛就會變到冇咁值錢。如果投資者唔識呢啲嘢，好易搞到自己損失慘重。
• 貴金屬（precious metal）：貴金屬係指罕有、具有高經濟價值嘅自然金屬，例如係金、銀同白金呀噉；呢啲金屬化學上穩定（唔易因為同第啲嘢起化學反應而走樣，所以好襟擺），有好多實用價值，例如係攞嚟整銀仔同珠寶，而喺現代有唔少科技產品都會用到呢啲貴金屬，例如金就成日俾人鍍落去電子電路嗰度嚟幫手導電；噉即係表示，貴金屬係一啲有恆定經濟價值嘅嘢，所以能夠保值－簡單例子：家陣有個人使咗 $x$ 咁多錢嚟買咗柞貴金屬，跟住通脹，搞到 $x$ 呢個量嘅錢嘅實際價值跌，但因為貴金屬依然仲係咁有用（實際價值冇變），於是個買咗貴金屬嘅人可以喺呢個時候賣咗啲貴金屬佢，得到 $y$ 咁多錢（$y>x$）－佢買貴金屬保護咗自己免受通脹嘅影響。
• 藝術品：藝術品除咗可以買嚟裝飾家居之外，仲可以用嚟做投資；原則上，藝術品可以好似股票噉升值－例：想像有個人由某位後生藝術家嗰度買咗幅畫，跟住佢將幅畫掛喺屋企埲牆上面做裝飾，若干年之後，嗰位後生藝術家成名（或者個經濟體入面啲人變得有錢，對藝術品等嘅奢侈品需求上升），令到幅畫嘅價值上升，個人就可以將幅畫賣咗佢賺錢。藝術品係一樣頗為高風險、低流通性嘅投資品，而且好長遠－專家指，投資藝術品要成起碼 10 年先會見到回報。

... 等等。原則上，如果一樣資產係可以攞嚟做投資嘅，噉呢樣資產實要能夠有可能隨時間升值或者保值。好似係屋、貴金屬同藝術品等嘅物品都係有可能升值或者保值嘅；相比之下，（例如）買生果唔會算係一種投資－正路嚟講，生果唔襟擺，一過咗咁上下耐嘅時間就會變到冇咁新鮮甚至會腐爛，即係話好似生果呢啲物品嘅價值基本上實會隨時間下跌。

第啲形式

• 儲錢：指將賺到嘅錢唔使住，並且擺落去一啲安全嘅地方，等第時先至攞返出嚟用；儲錢响廣義上可以算係投資－喺廿一世紀初嘅社會，啲人儲錢多數會儲落銀行嗰度，而銀行會俾利息，所以嚿錢理論上係會愈變愈大嚿嘅（「而家唔使錢」變成「第時多咗錢使」）。一般嚟講，儲錢係低風險低回報嘅，因為銀行儲蓄戶口嘅利息一般都唔係好高（例：美國 2021 年一個人儲錢每年平均淨係會賺到大約 0.04% 嘅利息），而且政府好多時仲會為咗鼓勵啲人攞啲錢去做第啲投資而減利率，搞到儲錢賺到嘅利息少咗。
• 教育：教育都可以算係廣義上嘅投資；啲人好多時會為咗讀書或者供仔女讀書而儲錢（啲錢而家唔使住），期望噉做能夠喺將來俾自己或者仔女讀一啲學位，預呢啲學位讀咗會提升自己或者仔女賺錢嘅能力（將來有更加大嚿嘅回報）。

... 等等。

投資策略

幾個人喺度留意住啲股票嘅價：
價值投資者：邊啲公司嘅潛力最受到低估呢？
增長投資者：邊啲公司業務最可能會增長呢？
動量投資者：邊隻股票嘅價近排升得最勁呢？

投資策略（investment strategy）係金融學等領域上好受關注嘅一個課題。廿一世紀初嘅投資策略通常都仲係經驗之談－主要係由玩投資玩得多嘅人諗，「有乜嘢投資行為大機會會令自己賺到錢」，「有乜嘢投資行為大機會會搞到自己有損失」，並且靠呢啲經驗嚟教人「投資嗰時要守啲乜嘢法則」。

喺廿一世紀初，比較常用嘅投資策略有以下呢啲：

• 價值投資（value investing）：指個投資者集中買認為係價錢低得滯嘅嘅股票；採用價值投資嘅投資者認為，靠金融投資賺錢嘅重點在於「市場上嘅第啲投資者唔能夠準確噉評估啲公司嘅潛力」－佢哋認為自己要做嘅嘢係用基本分析（fundamental analysis）對見到嘅上市公司作出分析，由呢啲分析嗰度搵出第啲人唔識珍惜嘅公司嘅股票，買入呢啲股票，而等到呢啲股票（一如自己預期）升嗰陣，自己就有賺。好出名嘅「股神」巴菲特（Warren Buffett）就好鍾意用價值投資呢種策略。
• 增長投資（growth investing）：指個投資者集中買一啲升值潛力高嘅股票；採用增長投資嘅投資者著眼於市場同公司嘅增長潛力－佢哋會分析唔同產品嘅市場，睇吓邊啲產品嘅公司喺未來最有增長潛力，再（用基本分析嘅結果同過往股價等嘅指標）睇吓呢啲產品嘅公司當中邊間最似會增長，然後就買入嗰啲公司嘅股票。廿一世紀初嘅研究指，增長投資嘅表現（長遠嚟講賺到幾多錢）冇價值投資咁好。
• 動量投資（momentum investing）：指個投資者集中買啲近排喺度升值嘅股票；動量投資嘅觀點主張，最能夠預測一隻股票嘅未來價錢嘅資訊就係嗰隻股票早排（一般係過去 3 至 12 個月）嘅價錢－就好似股價嘅上落會有動量噉，一隻股票愈升佢股升勢就會愈勁，一隻股票愈跌佢股跌勢就會愈勁，所以投資者要做嘅就係「買嗰排升勢勁嘅股票」同埋「賣嗰排跌勢勁嘅股票」。採取動量投資策略嘅投資者好睇重評估股價嘅升勢同跌勢，途中成日會用到數據科學（data science）上嘅技術。
• 平均成本法（dollar cost averaging，DCA）：同上述嗰幾隻策略唔互斥嘅做法；指揀好一隻策略，然後响一段時間內（例如一年內）每隔一段時間（例如每隔一個月）就將一嚿特定嘅錢攞嚟按揀咗嗰隻策略嚟做投資，例：喺一年內每隔一個月就揼 1,000 文嚟做價值投資。呢種做法被指係低風險，因為用呢種做法嘅投資者頂嗮櫳都只係會損失定咗嗰嚿投資用嘅錢。

... 等等。

經濟影響

一架貨船運緊貨；一個經濟體內部同經濟體之間要有商貿活動，就實需要資金－租貨船同運貨等嘅工作冚唪唥都會消耗資源。

喺廿一世紀嘅世界，投資對經濟增長（economic growth）嚟講好重要：

• 一盤生意要增長就實要用資本，例如家陣有間工廠想要提升自己生產效率，等自己第時賺多啲利潤，噉佢哋首先需要做嘅嘢就係使錢嚟得到多啲生產用嘅資本（例如係機械同工人呀噉），令到成間工廠嘅生產量提升，而喺呢個過程當中，佢哋需要資金－「買新嘅機械」同「請新嘅工人」等嘅嘢冚唪唥都係錢。
• 生意增長嘅過程會引致交易嘅發生，產生經濟增長（生產多啲嘢，滿足多啲慾望）嘅動力，例如間工廠由整生產用機械嘅廠嗰度購置機械，甚至乎研究點提升生產效率－當成個經濟體入面嘅人同埋組織各自為咗令自身利益最大化而擴充自己嘅生意嗰陣，就會令到個經濟體入面有更加多嘅經濟活動，產生更多嘅經濟價值，提升個經濟體嘅生產能力。

响上述嘅呢個過程當中，好似買股票等嘅金融投資活動會令到啲上市公司多啲資金使，而呢啲上市公司有資金就會為咗賺多啲錢而擴充自己嘅生意，令到上述嘅生產力提升過程得以進行。事實表明咗，响廿一世紀初嘅世界，各經濟體嘅本地生產總值（GDP）有好大部份都係因為投資而有嘅，例如喺 2017 年，中國齋係對固定資本（fixed capital；指機械等實質、喺生產過程當中俾人重複噉用嘅資本）嘅投資就經已霸咗 GDP 嘅成大約 42% 咁多。

市場情緒

市場情緒（market sentiment）指一個金融市場入面啲投資者嘅普遍態度，大致上可以分兩種：

• 牛市（bullish market）指啲投資者普遍預期個金融市場嘅價值會升（「好似隻牛角噉向上指」），而
• 熊市（bearish market）指啲投資者普遍預期個金融市場嘅價值會跌（「好似隻熊掌噉向下拍」）。

市場情緒展示咗投資當中存在嘅不理性：市場情緒由投資者嘅心理主宰，有陣時可以搞到金融市場有大嘅上落；好似係恐慌性拋售（selling climax）噉，就係金融學上一種相當受關注嘅現象－恐慌性拋售涉及個市場啲投資者突然間變到普遍都好想賣走手上嘅股票（例如可能有小道消息傳出，講啲上市公司利潤大跌），噉就會搞到股價突然間大跌，而呢種大跌會造成市場入面嘅上市公司突然唔見咗好大量嘅資金，對個經濟體嚟講可以好大鑊－啲上市公司嘅生產能力突然間大跌，可以引發嚴重嘅經濟衰退（recession）。

法蘭克福證券交易所外面嘅牛熊雕像

簡史

金融投資呢家嘢嘅起源係喺中世紀（5 至 15 世紀）嘅中後期：金融投資最早可以追溯到去伊斯蘭黃金時代（Islamic golden age；大約 8 至 14 世紀嘅伊斯蘭世界），當時嘅伊斯蘭世界喺經濟同科學等各方面有巨大嘅發展，佢哋開始有咗啲原始嘅金融工具，例如係俾若干個投資者將自己嘅資本交俾一個代理，然後個代理跟手就攞啲資本嚟做貿易，賺到利潤就會同啲投資者分，不過損失咗啲資本嗰陣個代理就唔使孭乜嘢責任－呢種安排可以話就好似係原始嘅股票同債券噉（投資者將資本交俾一個做生意嘅人，盤生意賺到利潤，啲投資者就有利潤分）。

及後喺大航海時代（Age of Discovery；15 至 18 世紀）嗰陣，歐洲人大舉噉四周圍探索同做生意，出現咗世上第一間證券交易所－一般認為，史上第一間證券交易所係由荷蘭東印度公司喺 1602 年嗰時成立嘅阿姆斯特丹證券交易所（Amsterdam Stock Exchange），當時荷蘭東印度公司開始賣自己嘅股份，係史上第一間賣自己股份嘅公司，正式開展咗好似現代金融投資噉嘅活動。

睇埋

• 利息
• 利率
• 財富
• 上市公司
• 金融市場
• 投資銀行
• 技術分析
• 財務管理
• 套戥
• 風險
• 延遲折扣
• 風險判斷

參考

• Cumming, D. (2007). Government policy towards entrepreneurial finance: Innovation investment funds (PDF). Journal of Business Venturing, 22(2), 193-235.
• Downes, J., & Goodman, J. E. (2014). Dictionary of finance and investment terms. Simon and Schuster.
• Duchin, R., Ozbas, O., & Sensoy, B. A. (2010). Costly external finance, corporate investment, and the subprime mortgage credit crisis (PDF). Journal of financial economics, 97(3), 418-435.
• Edwards, J., & Fischer, K. (1996). Banks, finance and investment in Germany. Cambridge University Press.
• Weinberg, J. A. (1994). Firm size, finance, and investment (PDF). FRB Richmond Economic Quarterly, 80(1), 19-40.

拎

• Journal of Investing，一本講投資嘅學術期刊。
• Journal of Investment Strategies，一本講投資策略嘅學術期刊。
• Investment. Investopedia.
• Investment Strategies To Learn Before Trading. Investopedia.