環卡洛斯一世

環卡洛斯一世
西班牙國王
在位	1975年11月20號ー2014年6月19號
加冕	1975年11月27號
前任	阿方索十三世 佛朗哥（西班牙考迪羅）
繼任	菲臘六世
配偶	蘇菲亞王后
子嗣	艾蓮娜王女 基斯提娜王女 菲臘六世
父王	環王子
出世	(1938-01-05) 1938年1月5號
出世地	意大利羅馬
簽章

環·卡洛斯一世（西班牙文：Juan Carlos I，1938年1月5號—），全名環·卡洛斯·艾方素·域托·瑪麗亞·德·波旁－波旁-兩西西里（西班牙文：Juan Carlos Alfonso Víctor María de Borbón y Borbón-Dos Sicilias），係西班牙前國王，1975年至2014年在任。

簡歷

早年同家族

環卡洛斯（左）同老豆環、細佬阿方素，1950年

1938年1月5號，環·卡洛斯響意大利羅馬Viale dei Parioli街出世，係阿斯圖里亞斯親王環王子同瑪麗亞·馬塞迪斯·波旁-兩西西里公主共同嘅第二個細路，第一個仔。由於王室喺1931年西班牙第二共和國成立後畀人廢咗，所以老豆同阿爺阿方索十三世走難到羅馬。佢之後由庇護十二世受洗。而佢嘅教父母，分別係阿嫲維多利亞·尤金妮亞同阿公卡洛斯·波旁-兩西西里。

佢有一個家姐：皮拉（1936–2020），仲有一個細妹瑪嘉烈塔（1939-）。另外佢仲有個細佬，叫阿方素。

1948年，佛朗哥宣佈恢復王室，環卡洛斯跟住老豆一齊返去西班牙。佢一開始響聖塞巴斯提安接受教育，最後響1954年由馬德里San Isidro學校畢業。

環卡洛斯，1968年

佢之後參軍，1955年至1957年響薩拉戈薩軍事學院深造，之後又曾經到馬林海軍學校同埋聖哈維耶爾空軍學校讀書。無耐，佢到馬德里康普頓斯大學讀法律，最後響1961年畢業。不過，環·卡洛斯其實有讀寫障礙，所以佢要比其他人花更大嘅努力先至讀到書。響讀完書後，佢搬到查瑞拉宮住。

1962年5月14號，佢同希臘同丹麥公主蘇菲亞響雅典結婚。蘇菲亞係希臘國王保羅一世嘅大女，王儲康士坦丁嘅家姐；而兩個人亦係第三代表兄妹關係。佢哋嘅婚禮先係響聖但尼大教堂跟羅馬天主教儀式搞，之後響雅典都主教座堂跟希臘東正教儀式搞。

細佬嘅死

響濯足節嘅夜晚，即1956年3月29號，細佬阿方素響葡萄牙海濱勝地艾斯杜尼嘅家族別墅死咗，原因係槍走火。西班牙官方係咁樣回應：

Whilst His Highness Prince Alfonso was cleaning a revolver last evening with his brother, a shot was fired hitting his forehead and killing him in a few minutes. The accident took place at 20.30 hours, after the Infante's return from the Maundy Thursday religious service, during which he had received holy communion.

據知，阿方素王子響嗰日贏到高爾夫比賽嘅獎，之後參加夜晚彌撒，衝入房去見當時啱由軍校返嚟嘅大佬環卡洛斯。環卡洛斯同阿方素都響入面玩一支子彈長22口俓嘅左輪手槍，而呢支手槍係屬於阿方素王子嘅。之後阿方素王子就死咗。由於當時得佢兩個響間房，所以冇人知道阿方素係點死，除咗環卡洛斯本人，所以過程眾說紛紜。根據佢阿媽個裁縫嘅講法，當時環卡洛斯唔知把槍已經上咗膛，就直至對住阿方素個頭，一槍打死咗佢；而環卡洛斯個老友波蘭度·阿隆素就話，環卡洛斯開槍嗰陣的確係唔知把槍已經上咗膛，不過係向牆開，結果子彈竟然反陣射中阿方素塊面。而根據家姐皮拉嘅講法，當時阿方素係想返入嚟間房，點知門柄撞到環卡洛斯，結果佢就開咗槍。雖然過程係有好多講法，但有一點可以肯定：就係阿方素嘅死由環卡洛斯造成。

響知道細仔死咗嘅消息後，老豆環王子好震驚，即刻跑上樓，嘗試救返細仔，但唔成功。激動嘅佢，捉住環卡洛斯大鬧：「話畀我知，你唔係特登嘅！」之後即刻送佢返軍校。

西班牙王子（1969-1975）

環卡洛斯同佛朗哥一齊閱兵，1969年攝

當時西班牙係由長槍黨領袖佛朗哥統治。佛朗哥響西班牙內戰入面獲得勝利，之後就做咗西班牙最高領導人；1947年，佢恢復西班牙王室，亦將環王子睇成係佢嘅繼承人。隨住佛朗哥年紀越嚟越大，左派人士抗議嘅聲音一浪接一浪，希望恢復民主；同時之間，右派又要求恢復君主制，令到佢好頭痛。雖然當時王位繼承人係環王子，前國王阿方素十三世三仔，但佛朗哥極度唔信任佢：因為環係自由主義者，佢好驚環登基後會作反、推翻自己政權。兩個人之間關係又好鬼差，更加堅定咗佛朗哥要將佢換走嘅諗法。

佛朗哥曾經考慮過兩位取代佢嘅人選：一係安茹同加的士公爵阿方素，凱瑂王子大仔，一位極度支持佛朗哥主義嘅波旁王室成員，後嚟仲同佛朗哥嘅孫女卡文結婚；二係環卡洛斯，環王子大仔。最終，佛朗哥認為環·卡洛斯更加可以繼續佢嘅獨裁統治，決定跳過一代人，直接欽點環·卡洛斯做佢嘅繼承人；王子亦都接受。呢個結果響波旁王室引起好大爭議，特別係環王子。環王子響一次巴塞羅那伯爵樞密院搞嘅私人會議上面，話自己先至係合法王位繼承人，環卡洛斯嘅存在會取代自己嘅一切權力。

唔理有幾多人反對，佛朗哥最終響1969年冊封環卡洛斯係西班牙王子（而唔係阿斯圖里亞斯親王），承認佢係王儲。而議會就響同年7月22號，批準咗佛朗哥嘅決定；條件係環卡洛斯要宣誓效忠佛朗哥主義。呢一點同佢老豆唔同，佢好快就宣咗誓。

環卡洛斯響做西班牙王子嗰陣成日同佛朗哥見面，又成日參加官方活動，仲大力支持獨裁政權，讚獨裁下嘅西班牙經濟有變好。由於佛朗哥年紀大機械壞，所以環卡洛斯都經常陪住佢出席公開活動。佢嘅行為惹嚟希望變天嘅左派人士抗議。

但係環卡洛斯同老豆一樣都係一位自由主義者，隨住時間一長，就開始靜雞雞作反。佢先係同流亡外國嘅自由派人士秘密見面，之後打電話同老豆秘密會談。佛朗哥對王子做嘅一切並唔知情，仲響顧問同下屬好心提佢「環卡洛斯響某方面唔忠心於佛朗哥政權」嗰陣，唔聽佢哋嘅勸告。

國王時代（1975-2014）

但係環·卡洛斯一世即位之後並無繼續獨裁專政，而係逐步引入徂民主政治，最終通過1978年西班牙憲法公投，推動西班牙和平恁過渡到君主立憲制。1981年，保皇派軍人發動政變，環·卡洛斯一世親自出馬平定政變，無人傷亡，令佢贏得廣泛讚譽。

2014年6月2號，環·卡洛斯一世突然宣布將會喺短時間之內退位，由佢個仔阿斯圖里亞斯親王菲臘皮繼位。佢喺6月19號正式退位。

退位後（2014-）

2020年8月，由於身陷貪腐醜聞，佢離開西班牙，喺阿聯酋過住流亡生活。